Buxoro maktabida inklyuziv ta'lim qanday natija bermoqda?
Buxoro viloyatidagi maktabda yo'lga qo'yilgan inklyuziv ta'lim alohida ehtiyojli bolalarning bilim olishi va jamiyatga moslashishiga xizmat qilmoqda.
Buxoro viloyati Kogon tumanidagi 7-umumiy o'rta ta'lim maktabida yo'lga qo'yilgan inklyuziv ta'lim jarayoni alohida ta'lim ehtiyojlariga ega bolalarning bilim olishi hamda tengdoshlari bilan birga ulg'ayishiga sharoit yaratmoqda. Bu tizim o'quvchilarning muloqotga kirishishi va mustaqil hayot ko'nikmalarini egallashida muhim ahamiyat kasb etmoqda.
Sharoit va amaliy natijalar
Bugungi kunda mamlakatimizda inson qadrini ulug'lash va ijtimoiy himoya tizimini takomillashtirish borasida ishlar olib borilmoqda. Kogon tumanidagi “Sorg'un” mahalla fuqarolar yig'inida 3 561 nafar aholi istiqomat qilsa, shundan 84 nafari nogironligi bo'lgan shaxslardir. Mahalladagi ijtimoiy xodim Zulayho Nurmatova aholining ijtimoiy himoyaga muhtoj qatlami bilan manzilli ish olib borib, ularning ta'lim olishi va jamiyat hayotida faol ishtirok etishi uchun ko'maklashmoqda.
Tumandagi 7-umumiy o'rta ta'lim maktabida hozirgi vaqtda 4 nafar alohida ta'lim ehtiyojlariga ega bola inklyuziv ta'limga jalb qilingan. Ular uchun maxsus pedagoglarning individual yondashuvi va qo'llab-quvvatlovchi muhit tashkil etilgan. Jumladan, mahallada yashovchi Husniya Norovaning qizi Shaxzodabonu ham mazkur maktabning inklyuziv sinfida o'qimoqda. Maxsus pedagogning sa'y-harakatlari tufayli u o'z shaxsiy ehtiyojlarini mustaqil bajarishni o'rganib, sinfdoshlari bilan muloqotga kirishmoqda va jamoat joylaridagi odob-axloq qoidalarini o'zlashtirib bormoqda.
Inklyuziv muhitning ahamiyati
Inklyuziv ta'limning samarasi faqat o'zlashtirilgan darslar yoki baholar bilan o'lchanmaydi. Bolaning o'z fikrini erkin ifoda etishi, do'stlari bilan suhbatlashishi va mustaqil harakat qilishga intilishi ham muhim ko'rsatkichdir. Bunday muhitda o'qiyotgan boshqa o'quvchilar ham o'zaro hurmat, bag'rikenglik va hamdardlik kabi insoniy fazilatlarni amalda o'rganadilar.
Ta'lim jarayonida yagona andoza emas, balki har bir bolaning shaxsiy xususiyatlari va rivojlanish sur'atiga mos yondashuv ustuvor bo'lishi lozim. Bu borada maxsus pedagoglar salohiyatini oshirish, ta'lim muassasalarining moddiy-texnik imkoniyatlarini kengaytirish va ota-onalar bilan hamkorlikni mustahkamlash talab etiladi.
Manba: UzA
