O'zbekistonda raqamli ta'lim ekotizimi va yoshlar uchun yangi imkoniyatlar kengaytiriladi

Mamlakatimizda yoshlar uchun raqamli ta'lim imkoniyatlarini yanada kengaytirish va zamonaviy ekotizimni shakllantirish bo'yicha muhim vazifalar belgilandi. Axborot texnologiyalari sohasida 2030-yilgacha 300 mingta ish o'rni yaratish rejasiga joriy yilning o'zida erishilgan bo'lib, endilikda raqamli iqtisodiyot yo'nalishlari hisobiga 2030-yilga qadar yana 500 mingta yangi ish o'rni ochish vazifasi qo'yildi. Bu borada o'quvchilarni o'qitishdan tortib, ularning ko'nikmalarini tasdiqlash va ishga joylashtirishni qamrab oluvchi yagona raqamli ta'lim tizimini yaratish muhimligi ta'kidlandi.

Ta'lim yo'nalishlari va o'qitish ko'lami

Kelgusi yillarda 5,5 million nafar yoshni an'anaviy hamda masofaviy shakllarda o'qitishga qaratilgan yondashuvlar ko'rib chiqildi. Maktab o'quvchilari uchun “Al-Xorazmiy vorislari” va “Besh million sun'iy intellekt yetakchilari” loyihalarini yanada kengaytirish, shuningdek, oliy ta'lim muassasalari va xususiy o'quv markazlari imkoniyatlarini birlashtirish ko'zda tutilgan. Robototexnika, kompyuter o'yinlarini yaratish va startaplar yo'nalishlarida yiliga 1 million nafar yoshni o'qitish vazifasi qo'yildi. Buning uchun milliy trenerlar korpusini shakllantirish, onlayn platformalar va qisqa muddatli raqamli kurslarni tezroq ishga tushirish zarurligi qayd etildi.

Oliy ta'lim va xalqaro hamkorlik

Oliy ta'lim muassasalarida kadrlar malakasini mehnat bozori o'zgarishlariga moslashtirish, xususan, sun'iy intellekt, mikrosxemalarni loyihalash, dron texnologiyalari va kompyuter o'yinlarini ishlab chiqish kabi yo'nalishlarni rivojlantirish taklif etildi. Informatika o'qituvchilarining sun'iy intellekt bo'yicha bilimlarini oshirib, ularni sertifikatlash, talabalar uchun xalqaro raqamli kurslardan foydalanish imkoniyatlarini kengaytirish masalalari muhokama qilindi. Farg'ona tajribasi asosida iOS dasturchilarini tayyorlash markazlari tashkil etiladi.

Shuningdek, yoshlarning bilimi va bandligini ta'minlash maqsadida ta'lim, til bilish darajasi hamda sertifikatlar haqidagi ma'lumotlarni jamlovchi “Raqamli yoshlar” platformasi rivojlantiriladi. Xalqaro texnologik kompaniyalar bilan hamkorlikni kengaytirib, o'tgan yili jalb qilingan 22 million dollarlik grant hajmini joriy yil yakunigacha 60 million dollarga, 2030-yilga borib esa yiliga 100 million dollarga yetkazish topshirildi. Ajratiladigan mablag'larning bir qismi raqamli ta'lim, malaka oshirish dasturlari va chekka hududlarda zamonaviy uskunalar bilan jihozlangan markazlarni tashkil etishga yo'naltiriladi.