O'zbekistonda inson kapitalini rivojlantirish va ta'lim islohotlarining yangi bosqichi boshlandi
Prezident Shavkat Mirziyoyev tomonidan e'lon qilingan milliy dasturda bilim va malakani taraqqiyotning asosiy kapitaliga aylantirish vazifasi qo'yildi.
Mamlakatimizda kelgusi o'n yillik “Milliy yuksalish davri” deb atalib, uning doirasida bilim va malakani taraqqiyotning asosiy kapitaliga aylantirish ustuvor vazifa etib belgilandi. Prezidentimiz Shavkat Mirziyoyev tomonidan e'lon qilingan yettita milliy dasturning birinchisi aynan ta'lim va inson kapitalini rivojlantirishga qaratilgan.
Ta'limga ajratilayotgan mablag'lar va sarmoya
Iqtisodiyotda bilim eng ishonchli sarmoya hisoblanadi. Statistika ma'lumotlariga ko'ra, mamlakatimizda ta'limga yo'naltirilgan davlat xarajatlari 2021-yildagi 39,6 trillion so'mdan 2025-yilda 84,2 trillion so'mga yetib, to'rt yilda 2,1 barobar oshdi. Ushbu islohotlar Uchinchi Renessans poydevorini yaratish g'oyasi bilan uzviy bog'liq bo'lib, bog'cha, maktab, oliy ta'lim va ilmiy muassasalar mazkur jarayonning uzviy halqalari sifatida belgilanmoqda.
Boshqaruv tizimidagi yangi o'zgarishlar
2026-yil 3-oktabrdagi PF-213-son farmonga muvofiq, Maktabgacha va maktab ta'limi vazirligi hamda Oliy ta'lim, fan va innovatsiyalar vazirligi negizida yagona Ta'lim va ilm-fan vazirligi tashkil etildi. Shuningdek, 19-oktabrda qabul qilingan PQ-380-son qarorga asosan vazirlik tuzilmasida Bilim va malakalarni baholash agentligi, Ta'lim va ilm-fan bo'yicha strategik tadqiqotlar va baholash markazi hamda Inson kapitalini rivojlantirish jamg'armasi ish boshlamoqda.
Bog'cha va maktab ta'limidagi yangiliklar
Ta'lim zanjirining ilk bo'g'ini bo'lgan maktabgacha ta'lim qamrovi 78 foizga yetkazildi. Milliy dasturga ko'ra, olti yoshli bolalarning 100 foizi maktabga tayyorlov guruhlariga qamrab olinadi. 2027-yil 1-yanvardan boshlab ishlaydigan onalarning 2–3 yoshli bolalarini oilaviy bog'chalarga joylashtirish xarajatlari davlat tomonidan qoplanadi.
Maktab ta'limida esa xalqaro PISA tadqiqotlari muhim ko'rsatkich bo'lib xizmat qilmoqda. PISA-2025 natijalariga ko'ra, o'quvchilarimiz tabiiy fanlardan 438 ball to'plab, 91 ta davlat va hudud orasida 48-o'ringa ko'tarildi. O'qituvchilar salohiyatini oshirish borasida ham ijobiy o'zgarishlar kuzatilib, milliy yoki xalqaro sertifikatga ega pedagoglar soni 143 nafarga yetdi, ularning salmoqli qismi yuqori oylik maosh olmoqda.
Manba: UzA
