O'zbekistonlik o'quvchilar xalqaro matematika olimpiadasida 12 ta medalni qo'lga kiritdi
Germaniyada bo'lib o'tgan Einstein International Olympiad 2026 musobaqasida O'zbekistonlik iqtidorli o'quvchilar yuqori natijalarni qayd etishdi.
Germaniyaning Berlin shahrida bo'lib o'tgan Einstein International Olympiad 2026 — Global Final xalqaro matematika olimpiadasi o'z nihoyasiga yetdi. Joriy yilning 26–30-oktabr kunlari tashkil etilgan nufuzli musobaqada dunyoning 15 dan ortiq davlatidan 300 nafardan ziyod iqtidorli o'quvchi o'z bilimini sinovdan o'tkazdi. Ushbu xalqaro bellashuvda qatnashgan O'zbekiston vakillari muvaffaqiyatli qatnashib, jami 12 ta medalni qo'lga kiritishdi.
Yuqori natijalar va chempionlar
Qayd etilgan natijalarga ko'ra, o'zbekistonlik o'quvchilar 3 ta oltin, 1 ta kumush, 3 ta bronza hamda 5 ta Honorable Mention medallariga sazovor bo'ldilar. Shuningdek, yana 4 nafar ishtirokchi faol ishtiroki uchun maxsus sertifikatlar bilan taqdirlandi. Musobaqa davomida ikki nafar o'quvchi jahon chempionati doirasidagi alohida yuqori natijalari evaziga qimmatbaho sovg'alar bilan taqdirlandi.
Musobaqaning eng e'tiborli yutuqlaridan biriga 8-sinf o'quvchisi Zufar Atayev mualliflik qildi. U matematika yo'nalishida 100 balldan 96 ball to'plab, o'z yosh kategoriyasida birinchi o'rinni egalladi va Jahon chempioni unvoniga sazovor bo'ldi. Shuningdek, 7-sinf o'quvchisi Aziz Ahmedov ham 76 ball to'plab, o'z yosh kategoriyasidagi 25 nafar ishtirokchi orasida uchinchi o'rinni egallashga erishdi.
Tantanali kutib olish
Umumiy hisobda O'zbekistondan borgan 16 nafar ishtirokchining 12 nafari medallarga ega chiqqan bo'lsa, qolgan 4 nafari sertifikatlar bilan qaytdi. G'olib o'quvchilarni Islom Karimov nomidagi Toshkent xalqaro aeroportida ustozlari, ota-onalari hamda sinfdosh do'stlari tantanali ravishda kutib olishdi.
Manba: UzA
