Surxondaryoda maktab o'quvchilarining O'quvchilar kengashi koordinatorlari saylandi

Surxondaryo viloyatida maktab o'quvchilarining ijtimoiy faolligini oshirish, ularning tashabbuslarini qo'llab-quvvatlash hamda yetakchilik qobiliyatini rivojlantirishga qaratilgan O'quvchilar kengashi saylovining viloyat bosqichi bo'lib o'tdi.

Saralash va yo'nalishlar

Termiz shahridagi Yoshlar markazida tashkil etilgan mazkur tadbirda hududiy saralash bosqichlaridanmuvaffaqiyatli o'tgan o'quvchilar qatnashdi. Ular kengashning yettita ustuvor yo'nalishi bo'yicha koordinatorlik hamda Kelajak lideri unvoni uchun o'z nomzodlarini ilgari surdi.

Ishtirokchilar ta'lim, madaniyat, axborot texnologiyalari va sun'iy intellekt, ekologiya, sport, media hamda ijtimoiy tashabbuslar yo'nalishlari bo'yicha o'z loyihalarini taqdim etdi. Shuningdek, yoshlar o'z g'oyalari, ularni hayotga tatbiq etish imkoniyatlari hamda kelgusidagi rejalari haqida atroflicha so'z yuritdi.

Ochiq va shaffof baholash jarayoni

Saylov jarayonida ishtirokchilarning bilim va ko'nikmalari, tashabbuskorligi, jamoa bilan ishlash qobiliyati hamda ilgari surgan takliflarining amaliy ahamiyatiga alohida e'tibor qaratildi. Hakamlar hay'ati nomzodlarning taqdimotlarini tinglab, ular bilan suhbatlar o'tkazdi. Barcha ishtirokchilarga o'z g'oya va takliflarini erkin bayon etishi uchun teng sharoitlar yaratilib, baholash hamda ovoz berish jarayonlari ochiq va shaffof tarzda tashkil etildi.

Tadbir yakuniy natijalariga ko'ra, Kelajak lideri etib saylangan o'quvchi hamda yettita yo'nalish bo'yicha saralangan koordinatorlarga ishonch yorliqlari topshirildi. Ushbu tashabbus o'quvchilarning yetakchilik salohiyatini ro'yobga chiqarish, ularni jamoat ishlariga keng jalb etish, tengdoshlari manfaatlarini munosib ifoda etish hamda ilgari surayotgan g'oyalarini amaliy loyihalarga aylantirishga xizmat qiladi.