Surxondaryo maktablarida 56 nafar xorijiy mutaxassis faoliyat yuritmoqda

Surxondaryo viloyatida umumiy o'rta ta'lim sifatini oshirish, o'quv jarayoniga ilg'or xorijiy tajribalarni joriy etish hamda o'quvchilarning zamonaviy bilim va ko'nikmalarni egallashi uchun keng imkoniyatlar yaratishga alohida e'tibor qaratilmoqda. Ayni paytda viloyatdagi umumta'lim maktablarida 56 nafar xorijiy mutaxassis pedagogik faoliyat olib bormoqda. Ular o'quvchilarga zamonaviy ta'lim usullari asosida saboq berish bilan birga, mahalliy o'qituvchilar bilan o'zaro tajriba almashmoqda.

Mazkur ishlar Prezident Shavkat Mirziyoyev rahbarligida 2023-yil 28-avgust kuni o'tkazilgan kengaytirilgan videoselektor yig'ilishida belgilangan vazifalar ijrosi doirasida amalga oshirilmoqda. Xususan, yig'ilishning 28-sonli bayoni 14.2-bandiga muvofiq, 2024/2025 o'quv yilidan boshlab Qoraqalpog'iston Respublikasi, viloyatlar va Toshkent shahar hokimliklari bilan hamkorlikda mamlakatimiz ta'lim muassasalariga 1 ming 500 nafar xorijiy mutaxassisni jalb etish vazifasi belgilangan.

Xorijiy pedagoglarning o'rni va tajriba almashish

Surxondaryo viloyati maktablarida xorijiy pedagoglarning faoliyat yuritayotgani ushbu tashabbusning amaliy ifodasidir. Ular tomonidan qo'llanilayotgan ilg'or o'qitish uslublari dars mashg'ulotlarini yanada mazmunli tashkil etish, o'quvchilarning bilimga qiziqishini oshirish va amaliy ko'nikmalarini rivojlantirishga xizmat qilmoqda. Shuningdek, xorijiy mutaxassislar bilan hamkorlik mahalliy pedagoglarning kasbiy mahoratini oshirish, xalqaro ta'lim tajribasini o'rganish hamda ta'lim jarayoniga zamonaviy yondashuvlarni tatbiq etish uchun qo'shimcha imkoniyatlar yaratmoqda.