Central Asian University 2026 yilda qabul kvotalarini qisqartirib, raqobatni kuchaytirmoqda

Central Asian University 2026 yilda qabul kvotalarini qisqartirish orqali tanlovni yanada kuchaytirmoqda. Bunday yondashuv kamroq o'rin, yuqoriroq talablar hamda kuchliroq raqobatga asoslangan yangi qabul mantiqini aks ettiradi. Universitet asosiy yo'nalishlar bo'yicha abituriyentlarni saralashni kuchaytirib, yuqori darajadagi akademik muhitni shakllantirishni maqsad qilgan.

Qabul jarayoni va shaffoflik

Ta'lim dargohining rasmiy veb-saytida har bir maktab bo'yicha bitta o'ringa to'g'ri keladigan nomzodlar sonini ko'rsatuvchi maxsus jadval e'lon qilindi. Abituriyentlar va ularning ota-onalari tanlovdagi joriy vaziyatdan xabardor bo'lib turishi uchun mazkur jadval har kuni yangilab boriladi.

CAU xalqaro olimpiadasi va grantlar

Joriy qabul kampaniyasining muhim yangiliklaridan biri 12-13 iyun kunlari universitet kampusida tashkil etiladigan xalqaro olimpiadadir. Kimyo, matematika va fizika fanlari bo'yicha o'tkaziladigan bu musobaqa natijalariga ko'ra, ishtirokchilar o'qish davri uchun 100 foizgacha grant yutib olishlari hamda "Be Student" tayyorlov dasturida maxsus imkoniyatlarga ega bo'lishlari mumkin.

Sinflar kesimidagi imkoniyatlar

• 11-sinf o'quvchilari uchun: 1-3-o'rinni egallaganlarga butun o'qish davri uchun 100 foizlik ta'lim granti, 4-6-o'rinlarga 50 foizlik grant, 7-10-o'rinlarga esa 25 foizlik grant beriladi.
• 10-sinf o'quvchilari uchun: 1-3-o'rin egalariga butun o'qish davri uchun 100 foizlik ta'lim granti, 4-10-o'rinlarga "Be Student" dasturida bepul o'qish va uni muvaffaqiyatli tamomlaganda CAU'ga kirish kafolati taqdim etiladi.
• 9-sinf o'quvchilari uchun: 1-10-o'rin egalari "Be Student" dasturida bepul o'qish va keyinchalik universitetga kirish kafolatini qo'lga kiritadilar.

Shuni yodda tutish kerakki, 11-sinflar uchun ajratilgan grantlar har bir semestr yakunida GPA ko'rsatkichi 3.3 dan past bo'lmasligini talab qiladi. Tibbiyot va stomatologiya yo'nalishlari uchun IELTS 6.0 yoki uning ekvivalenti, boshqa yo'nalishlar uchun esa IELTS 5.5 sertifikati talab etiladi. 10-sinf g'oliblarining granti esa bitiruv yiligacha saqlanib qoladi va kirish imtihonlari hamda til talablari muvaffaqiyatli bajarilgandan keyin rasmiylashtiriladi.