Jahon universitetlari reytingi markazi 2026 yilgi eng yaxshi OTMlar ro'yxatini e'lon qildi
Jahon universitetlari reytingi markazi (CWUR) 2026 yilgi eng yaxshi oliy ta'lim muassasalari ro'yxatini e'lon qildi. Unda O'zbekiston OTMlari joy olmadi.
Jahon universitetlari reytingi markazi (CWUR) tomonidan 2026 yil uchun dunyoning eng yaxshi universitetlari reytingi e'lon qilindi. Mazkur hisobotni tayyorlash jarayonida 100 ga yaqin mamlakatdan 21 mingdan ortiq universitet faoliyati atroflicha tahlil qilinib, ulardan eng kuchli 2 mingtasi saralab olindi. E'tiborli jihati, O'zbekiston universitetlaridan birortasi ham ushbu top-2000 reytingga kira olmadi.
Reytingning asosiy mezonlari va xususiyatlari
CWUR tuzgan reyting o'zining xolisligi bilan ajralib turadi. Unda hech qanday so'rovnomalar yoki oliy ta'lim muassasalarining o'zlari taqdim etgan ma'lumotlarga tayanilmaydi, balki faqat real natijalar baholanadi. Baholash jarayonida quyidagi to'rtta asosiy mezon hisobga olinadi:
- Tadqiqot faoliyati (40 foiz)
- Ta'lim sifati (25 foiz)
- Bitiruvchilarga bo'lgan talab (25 foiz)
- O'qituvchilar tarkibi sifati (10 foiz)
Reytingni tuzishda millionlab ilmiy nashrlar, iqtiboslar, xalqaro mukofotlar hamda bitiruvchilarning karera yutuqlari chuqur tahlil qilinadi. Jami 21 mingdan ortiq OTM baholanib, ulardan Global 2000 ro'yxati shakllantiriladi.
Dunyoning eng yaxshi 10 taligi
2026 yilgi CWUR ma'lumotlariga ko'ra, dunyoning eng yaxshi o'ntaligidan quyidagi universitetlar joy oldi:
- Harvard universiteti (AQSh)
- Massachusets texnologiya instituti (MIT) (AQSh)
- Stenford universiteti (AQSh)
- Kembrij universiteti (Buyuk Britaniya)
- Oksford universiteti (Buyuk Britaniya)
- Prinston universiteti (AQSh)
- Pensilvaniya universiteti (AQSh)
- Kolumbiya universiteti (AQSh)
- Yyeyl universiteti (AQSh)
- Chikago universiteti (AQSh)
Umuman olganda, mazkur ro'yxatda AQSh oliy ta'lim muassasalari yaqqol ustunlik qilmoqda. Shunga qaramay, Buyuk Britaniya, Yaponiya, Kanada, Fransiya, Xitoy va boshqa davlatlarning universitetlari ham yuqori o'rinlarni egallashga muvaffaq bo'lgan. O'zbekiston oliy ta'lim muassasalari esa tadqiqot faoliyati, iqtiboslar soni, o'qituvchilar sifati va bitiruvchilarning karera yutuqlari kabi asosiy mezonlar bo'yicha mazkur ro'yxatga kirmadi.
Manba: Kun.uz
