Oliy ta'lim tizimini rivojlantirishga qaratilgan yangi farmon imzolandi

2026-yil 10-aprelda imzolangan “Oliy ta'lim, fan va innovatsiyalar tizimini takomillashtirishning qo'shimcha chora-tadbirlari to'g'risida”gi Prezident farmoniga binoan, tarmoqda qator o'zgarishlar amalga oshiriladi. Xususan, Oliy ta'lim, fan va innovatsiyalar vazirligi huzuridagi Oliy ta'limni rivojlantirish tadqiqotlari markazi negizida Oliy ta'limni rivojlantirish va global hamkorlik markazi ish boshlaydi.

Yangi stipendiya dasturi va qabul tartibi

Respublika davlat oliy ta'lim muassasalarining bakalavriat bosqichiga muayyan o'quv yili uchun ajratilgan grant kvotalarining ishlatilmay qolgan qismi hisobidan har yili 500 nafargacha iqtidorli xorijiy fuqarolarga o'qish imkonini beruvchi “Yangi O'zbekiston stipendiyasi” dasturi yo'lga qo'yiladi. Shuningdek, 2026/2027 o'quv yilidan boshlab xorijiy talabalarni qabul qilishning mavjud tartibiga qo'shimcha ravishda “Study in Uzbekistan” platformasi orqali qabul qilish amaliyoti joriy etiladi.

Sertifikat bo'yicha imtiyozlar va yangi markazlar

Bundan tashqari, 2026/2027 o'quv yilidan ta'lim dasturini chet tilida tamomlagan bitiruvchilar o'qishning navbatdagi bosqichiga hujjat topshirish jarayonida xorijiy tilni bilish darajasini tasdiqlovchi sertifikat taqdim etish majburiyatidan ozod etiladi.

Farmon bilan tashkiliy masalalarga ham alohida e'tibor qaratilgan. Raqamli ta'lim texnologiyalarini rivojlantirish markazi bazasida Raqamli ta'lim va sun'iy intellektni rivojlantirish markazi tuziladi. Shu bilan birga, Innovatsiyalarni joriy qilish va texnologiyalar transferi milliy ofisi hamda Yoshlar akademiyasi negizida Yoshlarning innovatsion tashabbuslarini qo'llab-quvvatlash ofisi tashkil etilishi belgilandi.