O'zbekistonda milliy tadqiqot universiteti maqomini berish tartibi belgilanmoqda

Prezidentning “Oliy ta'lim, fan va innovatsiyalar tizimini takomillashtirishning qo'shimcha chora-tadbirlari to'g'risida”gi farmoniga binoan mamlakatimiz oliy ta'lim tizimini yanada rivojlantirishga qaratilgan bir qator muhim o'zgarishlar amalga oshirilishi belgilandi.

Milliy tadqiqot universiteti maqomi

“U 10 – O'zbekistonning global ilg'or universitetlari” dasturi doirasida muhim qadam tashlanadi. Unga ko'ra, Innovatsion rivojlanish agentligi tomonidan davlat ilmiy dasturlari asosida tashkil etiladigan tanlovda g'olib chiqqan 10 ta oliy ta'lim tashkilotiga milliy tadqiqot universiteti maqomi taqdim etiladi. Ushbu maqom oliygohlarning ilmiy salohiyatini yuksaltirish hamda ularning xalqaro miqyosdagi raqobatbardoshligini mustahkamlash yo'lida xizmat qiladi.

Moliyaviy rag'batlantirish va reyting tizimi

Shuningdek, 2027 yilning 1 yanvar sanasidan boshlab oliy ta'lim tashkilotlarining milliy reyting ko'rsatkichlariga tayanuvchi moliyaviy rag'batlantirish mexanizmi amaliyotga tatbiq etiladi. Mazkur tartibga asosan, oliygohlarning faoliyat samaradorligi baholanib, ular tegishli toifalarga bo'linadi.

Milliy reyting natijalariga ko'ra, har bir toifa guruhidagi oliy ta'lim muassasalarining 20 foizi birinchi darajaga, 40 foizdan qismi esa ikkinchi va uchinchi darajalarga kiritilishi ko'zda tutilgan.

Davlat granti xarajatlarini hisoblashning yangi tartibi

Bundan tashqari, 2027 yildan boshlab davlat granti asosida tahsil olayotgan talabalarning o'qitish xarajatlarini hisoblab chiqish tartibiga ham o'zgartirish kiritiladi. Bunda bir qator muhim mezonlar, jumladan, professor-o'qituvchilarga to'g'ri keladigan talabalar soni, ta'lim yo'nalishining murakkablik darajasi, moddiy-texnik baza salohiyati, ustuvor sohalarga mos kelishi hamda oliy ta'lim muassasasining ilmiy yo'naltirilganligi kabi omillar hisobga olinadi.