O'zbekistonda Urbanizatsiya, kadastr va geodeziya oliygohi tashkil etiladi
Poytaxtda yangi oliy ta'lim muassasasi hamda kreativ park ochilishi kutilmoqda. Bu haqda prezident selektorida ma'lum qilindi.
O'zbekistonda yangi Urbanizatsiya, kadastr va geodeziya oliygohi faoliyat boshlaydi. Mazkur oliy ta'lim muassasasi o'zini o'zi moliyalashtirish tamoyili asosida ishlaydi hamda uning qoshida o'rta bo'g'in kadrlari uchun maxsus texnikum ham tashkil etiladi. Bu haqda 14 aprel kuni urbanizatsiya masalalariga bag'ishlab o'tkazilgan prezident selektorida ma'lum qilindi.
Kreativ parklar barpo etiladi
Yig'ilish davomida arxitektor, loyihachi va urbanistika sohasi mutaxassislari uchun mamlakatimizda ilk bor kreativ parkni Toshkent shahrida barpo etish rejalashtirilgani aytildi. Shuningdek, kelgusida bunday turdagi kreativ parklarni hududlarda ham tashkil etish ishlarini boshlash vazifasi mas'ullarga yuklatildi.
Rahbarlar hisoboti va tadbirkorlar tashabbuslari
Tadbir doirasida davlat rahbari Shavkat Mirziyoyev mutasaddi rahbarlar va soha vakillarining hisobotlarini qabul qildi. Shuningdek, qurilish yo'nalishida faoliyat olib borayotgan tadbirkorlarning bildirilgan taklif hamda tashabbuslari ham atroflicha eshitildi.
Manba: Kun.uz
