O'zbekistonlik talabalar xalqaro yadro texnologiyalari qishki maktabida qatnashdi
O'zbekistonlik talabalar Rossiyaning Obninsk shahrida o'tgan xalqaro qishki maktabda ishtirok etib, sovrinli o'rinlarni qo'lga kiritdi.
Rossiyaning Obninsk shahrida III Xalqaro "Obninsk Tex" qishki maktabi yakunlandi. Unda 47 ta davlat va 32 ta oliy ta'lim muassasasidan jami 128 nafar talaba qatnashdi. Dastur Obninsk atom energetikasi instituti negizida "Rosatom" davlat korporatsiyasi ko'magida tashkil etildi. O'zbekistondan mazkur tadbirda “MMFI” Milliy tadqiqot yadro universitetining Toshkentdagi filiali talabalari ishtirok etdi. Safar Vazirlar Mahkamasi huzuridagi Atom energiyasi agentligi ko'magida amalga oshirildi.
Ta'lim dasturi va amaliy mashg'ulotlar
Ishtirokchilar bir hafta davomida dozimetriya, radiatsiya nazorati, AES uchun elektronika va avtomatika, 3D-modellashtirish hamda materialshunoslik yo'nalishlari bo'yicha ma'ruza va laboratoriya mashg'ulotlarida qatnashdi. Shuningdek, A.I. Leypunskiy nomidagi Fizika-energetika instituti, "Rosatom" Texnika akademiyasi, A.F. Sыb nomidagi Tibbiy radiologiya ilmiy markazi hamda boshqa tashkilotlarga texnik safarlar uyushtirildi.
“MMFI” Milliy tadqiqot yadro universitetining Toshkentdagi filiali 4-bosqich talabasi Imron Masharipovning ta'kidlashicha, ushbu safar unga nazariy bilimlarini amalda sinab ko'rish va sohaning infratuzilmasini yaqindan o'rganish imkonini berdi.
Musobaqa va yutuqlar
Qishki maktab doirasida jamoaviy musobaqalar va "XakAtom" loyiha tanlovi o'tkazildi. O'zbekistonlik talabalar yuqori tayyorgarlik darajasini ko'rsatdi:
- Artemiy Rajapov va Adibaxon Abduqodirova "Atom triatloni" musobaqasida II o'rinni egalladi.
- Artemiy Rajapov loyiha tanlovi sovrindorlari qatoridan joy oldi.
"Obninsk Tex" loyihasi atom energetikasini rivojlantirayotgan mamlakatlar uchun yuqori malakali mutaxassislar tayyorlash hamda xalqaro professional hamjamiyatni shakllantirishga qaratilgan.
Manba: UzA
