Prezident maktablariga 2026-2027 o'quv yili uchun hujjat topshirish muddatlari e'lon qilindi
Prezident maktablariga 2026-2027 o'quv yili uchun hujjatlar qabuli 25-maydan 14-iyunga qadar onlayn tarzda boshlanadi.
Mamlakatimizda iqtidorli yoshlarni qo'llab-quvvatlash hamda ularning zamonaviy bilim va ko'nikmalarni egallashi uchun keng imkoniyatlar yaratishga alohida e'tibor qaratilmoqda. Xususan, Prezident maktablari yoshlarning intellektual salohiyatini rivojlantirishda muhim ahamiyat kasb etmoqda.
Ixtisoslashtirilgan ta'lim muassasalari agentligining ma'lumotiga ko'ra, 2026-2027 o'quv yili uchun Prezident maktablariga hujjatlar qabuli 25-maydan 14-iyunga qadar onlayn shaklda amalga oshiriladi. Nomzodlar ariza topshirish jarayonini my.gov.uz va ariza.piima.uz platformalari orqali bajarishlari mumkin.
Talab etiladigan hujjatlar
Prezident maktablariga ariza topshirish jarayonida quyidagi hujjatlar talab etiladi:
- O'quvchining so'nggi ikki oy davomida tushgan fotosurati;
- Tug'ilganlik haqidagi guvohnoma;
- Tegishli o'quv yili natijalariga ko'ra baholar tabelining maktab direktori tomonidan tasdiqlangan nusxasi yoki QR-kod bilan tasdiqlangan elektron tabeli;
- Ota-ona yoki qonuniy vakilning fuqarolik pasporti ma'lumotlari hamda bog'lanish uchun telefon raqamlari.
Nomzodlarga qo'yiladigan talablar
Ma'lum qilinishicha, Prezident maktablariga 4-sinfni tamomlagan o'quvchilar 5-sinfga qabul qilinadi. Bunda talabgorning baholar tabelidagi matematika va tabiatshunoslik fanlaridan 4-sinfdagi yillik baholari 5 - a'lo bo'lishi qat'iy talab etiladi.
Manba: UzA
