Samarqand davlat texnika universiteti tashkil etilganining 60 yilligini nishonladi

Mirzo Ulug'bek nomidagi Samarqand davlat texnika universitetida ushbu oliy ta'lim muassasasining 60 yilligi munosabati bilan ma'rifiy tadbir tashkil etildi. Unda Samarqand viloyati hokimligi hamda oliy o'quv yurtlari mas'ullari, sobiq bitiruvchilar, professor-o'qituvchilar va talabalar ishtirok etdi.

Tadbir qatnashchilari dastlab ilm dargohining tarixi aks ettirilgan ko'rgazmalar bilan tanishishdi. Har bir kafedra va fakultet faoliyati, o'tgan yillar davomida qo'lga kiritilgan natijalar haqida ma'lumotlar taqdim etildi.

Universitet tarixi va rivojlanish bosqichlari

Ta'lim dargohining tashkil topishi Markaziy Osiyo va O'zbekistonda malakali quruvchi hamda me'mor muhandislarga ehtiyoj yuqori bo'lgan 1966-yilga borib taqaladi. Toshkent zilzilasidan so'ng, hukumat qaroriga binoan Samarqand davlat arxitektura-qurilish instituti tuzilgan edi. Oshkora faoliyatini bitta fakultet, yettita kafedra hamda 525 nafar talaba bilan boshlagan institut uchun shahardagi 19-internat binolari ajratilgan edi. Vaqt o'tishi bilan oliygoh o'z talabalar turar joylari, sport inshootlari va o'quv korpuslariga ega bo'lib, fakultetlari soni 4 taga, kafedralari esa 25 taga yetkazildi.

Universitet rektori Chidem Turkyilmazning so'zlariga ko'ra, so'nggi to'rt yil ichida oliygoh tarixida muhim burilishlar yuz bergan. 2022-yil 8-noyabrdagi Prezident qaroriga asosan institutga universitet maqomi berilgan bo'lsa, keyingi yil 26-maydagi qaror bilan uning negizida Samarqand davlat texnika universiteti tashkil etildi. Hozirgi kunda muassasada arxitektura, qurilish, dizayn va shaharsozlik maktablari bilan bir qatorda energetika, mexanika, metallurgiya, kimyo muhandisligi, mexatronika va robototexnika hamda kompyuter injiniringi yo'nalishlari kengaytirib borilmoqda. Shuningdek, 2027-2028 o'quv yilidan boshlab intellektual suv texnologiyalari ilg'or muhandislik maktabini ochish rejalashtirilgan.

Bugungi kundagi salohiyat

Ayni paytda mazkur universitetda 9 mingga yaqin talaba tahsil olmoqda. 28 ming kvadrat metrdan iborat yangi o'quv binosida 4300 o'ringa mo'ljallangan xonalar, 350 o'rinli kutubxona va 20 dan ortiq zamonaviy laboratoriya xonalari faoliyat ko'rsatmoqda. Xalqaro aloqalar doirasida 22 davlatning oliy ta'lim muassasalari va tashkilotlari bilan hamkorlik yo'lga qo'yilgan. Xususan, Xitoyning qurilish sifatini nazorat qilish tashkiloti bilan tuzilgan 4 million dollarlik loyiha doirasida universitet huzurida maxsus ilmiy-tadqiqot instituti ochildi.

Tadbir yakunida ta'lim dargohi rivojiga o'z hissasini qo'shgan sobiq bitiruvchilar, professor-o'qituvchilar va rahbarlarga esdalik sovg'alari topshirildi.