Toshkent viloyatida oliy ta'lim muassasalari bitiruvchilari bandligini oshirish choralari ko'rilmoqda

Toshkent viloyati hokimi Zoyir Mirzayev hududdagi oliy ta'lim muassasalari rektorlari bilan uchrashuv o'tkazdi. Muloqot davomida oliy ta'lim tizimini rivojlantirish, bitiruvchi yoshlarning bandligini ta'minlash hamda kadrlar tayyorlashda nazariya va amaliyot uyg'unligini kuchaytirish masalalari ko'rib chiqildi. Prezidentning yoshlar bilan uchrashuvida talabani oliy ma'lumotli qilish bilan birga uning bandligini ta'minlash mas'uliyati bevosita OTM rektorlari zimmasiga yuklatilgani alohida ta'kidlandi. Shundan kelib chiqib, yig'ilishda bitiruvchilarni ish bilan ta'minlash masalasi asosiy yo'nalish sifatida belgilandi.

Bitiruvchilar bandligi va ish beruvchilar hamkorligi

Uchrashuvda har bir oliy ta'lim muassasasi tomonidan bitiruvchilar bandligini ta'minlash bo'yicha ishlab chiqilgan chora-tadbirlar rejasi muhokama qilindi. Xususan, ish beruvchi tashkilotlar bilan hamkorlikni kuchaytirish va kadrlar tayyorlash jarayonini mehnat bozori talablariga moslashtirish masalalariga e'tibor qaratildi. Viloyat hokimi hududdagi barcha korxona va tashkilotlar rahbarlariga OTMlarga borib, mavjud vakant o'rinlar haqida ma'lumot berish hamda bitiruvchilar orasidan o'z ehtiyojlariga mos kadrlarni tanlab olish bo'yicha amaliy ishlarni boshlashni topshirdi.

Dual ta'lim va yangi tashabbuslar

Muloqotda dual ta'lim tizimini yanada kengaytirish masalasiga ham alohida to'xtalib o'tildi. Ushbu yo'nalish talabalarga o'qish davridayoq ishlab chiqarish va xizmat ko'rsatish sohalarida amaliy ko'nikmalarga ega bo'lish imkoniyatini berishi, ularning nazariy bilimlarini real mehnat bozori talablari bilan uyg'unlashtirishi ta'kidlandi. Bundan tashqari, barcha OTMlarda banklar ishtirokida "Loyiha ofisi"ni tashkil etish belgilandi. Bu tuzilma talabalarning startap va biznes tashabbuslarini qo'llab-quvvatlash, istiqbolli loyihalarni moliyalashtirishga yo'naltirish hamda yoshlarning tadbirkorlik faolligini oshirishga xizmat qiladi.

Shuningdek, yoshlar o'rtasida sog'lom turmush tarzini targ'ib qilish va sportni ommalashtirish maqsadida barcha sport yo'nalishlari bo'yicha "Rektor kubogi" musobaqalarini yo'lga qo'yish tashabbusi ilgari surilib, mas'ullarga tegishli topshiriqlar berildi.