Andijon davlat texnika institutida Zahiriddin Muhammad Bobur tavalludiga bag'ishlangan adabiy-musiqiy kecha o'tkazildi
Andijon davlat texnika institutida Zahiriddin Muhammad Bobur tavalludining 543 yilligiga bag'ishlangan adabiy-musiqiy kecha bo'lib o'tdi.
Bobur tavalludining 543 yilligi nishonlandi
Andijon davlat texnika institutida buyuk shoh va mutafakkir shoir Zahiriddin Muhammad Bobur tavalludining 543 yilligiga bag'ishlangan ma'naviy-ma'rifiy, adabiy-musiqiy kecha tashkil etildi. Talaba-yoshlar orasida ma'naviy-ma'rifiy ishlar samaradorligini oshirish, milliy musiqa san'atini targ'ib etish, uni asrab-avaylash hamda ulug' ajdodimizning ijodiy merosini o'rganishga bo'lgan qiziqishni kuchaytirishga qaratilgan ushbu tadbirda professor-o'qituvchilar va talabalar faol qatnashdi.
Tadbirning ochilish qismida O'zbekiston Yozuvchilar uyushmasining viloyati bo'limi rahbari, shoira Xurshida Vahobjon qizi so'zga chiqib, Bobur Mirzoning hayoti va boy ijodi xususida to'xtaldi va uning g'azaliga bog'langan muhammasni o'qib berdi.
Mumtoz kuy va qo'shiqlar ijrosi
Kecha davomida O'zbekiston davlat filarmoniyasi Andijon filiali san'atkorlari tomonidan Zahiriddin Muhammad Bobur g'azal va ruboiylari asosida yaratilgan kuy-qo'shiqlar jonli ijroda mahorat bilan yangradi. Bobur she'riyatining go'zal namunalari hamda mumtoz ohanglar yig'ilganlarda chuqur taassurot qoldirdi.
Institut katta o'qituvchisi va Ma'naviyat targ'ibotchilar jamiyati a'zosi Muhtarama Aliyeva o'zbek mumtoz musiqa san'ati taraqqiyotida shoirning ijodiy merosi muhim o'rin tutishini ta'kidladi. Uning so'zlariga ko'ra, ulug' shoirning betakror asarlari asosida yaratilgan musiqiy durdonalar o'zining jozibali ohangi, chuqur falsafiy mazmuni hamda yuksak badiiy saviyasi bilan asrlar davomida muxlislarni bahramand etib kelmoqda. Mazkur adabiy-musiqiy tadbir yoshlarni milliy va ma'naviy qadriyatlarimizga hurmat ruhida tarbiyalashda muhim ahamiyat kasb etdi.
Manba: UzA
