Sirdaryolik maktab o'quvchisi AQSH universitetiga muddatidan oldin qabul qilindi

Sirdaryo viloyati Guliston tumanidagi 1-sonli umumta'lim maktabining 11-sinf o'quvchisi Sardorbek Xolyigitov AQSHning nufuzli oliy ta'lim maskanlaridan biri bo'lgan Kolorado Davlat universitetiga muddatidan oldin qabul qilindi. Iste'dodli o'quvchi 2026 yil kuzgi semestrdan boshlab ushbu oliygohning bakalavriat bosqichida o'qishni boshlaydi.

Sardorbekning bu yutug'i uning ko'p yillik mehnati, o'z ustida tinimsiz ishlashi hamda xalqaro ta'lim tizimiga bo'lgan intilishining samarasi hisoblanadi. Uning so'zlariga ko'ra, xorijiy universitetga hujjat topshirish jarayoni katta tajriba maktabi bo'lgan va bu maqsad sari uzoq vaqtdan beri harakat qilib kelgan.

Yutuq va rejalar

Quvonchli voqea munosabati bilan tuman hokimining o'rinbosari Xurshid Chelibayev hamda tuman maktab va maktabgacha ta'lim bo'limi mudiri Dilmurod Qodirqulov o'quvchi bilan uchrashuv o'tkazdi. Muloqot davomida yosh iqtidor egasining kelajakdagi rejalari, xalqaro tajriba orqali zamonaviy bilimlarni o'zlashtirish masalalari muhokama qilindi.

Sardorbek chet elda olgan bilim va tajribasini kelgusida yurtimizda qo'llashni hamda yoshlar uchun foydali tashabbuslar bilan chiqishni niyat qilganini ta'kidladi. Mas'ullar esa bu muvaffaqiyat boshqa o'quvchilar uchun ham katta ibrat ekanini qayd etib o'tdilar.