Andijonda asosiy fan olimpiadalarining tuman bosqichlari oldidan o'quv-seminar tashkil etildi
Andijon viloyatida fan olimpiadalarining tuman va shahar bosqichlarini adolatli hamda shaffof o'tkazishga bag'ishlangan o'quv-seminar bo'lib o'tdi.
Joriy yil 15-oktabr sanasidan boshlab yurtimizda asosiy fan olimpiadalarining tuman va shahar bosqichlari start olishi rejalashtirilgan. Mazkur muhim jarayonni belgilangan talablarga qat'iy amal qilgan holda, adolatli va shaffof tarzda tashkil etish maqsadida Andijon viloyati Maktabgacha va maktab ta'limi boshqarmasida maxsus o'quv-seminari o'tkazildi. Unda tuman hamda shahar bo'limlarining fan olimpiadalari mas'ul xodimlari qatnashdi.
Seminarni boshqarma boshlig'i o'rinbosari Ismoil Mirzayev ochib berib, mazkur yo'nalishdagi ishlarni yuqori samaradorlik bilan tashkil etish masalalariga alohida to'xtaldi.
Baholash mezonlari va tartiblar tushuntirildi
Tadbir davomida Respublika fan olimpiadlari markazi mas'ul xodimi F.Obilov ishtirokchilarga olimpiadaning tuman hamda shahar bosqichlarini o'tkazish tartibi va amaldagi jarayonlar yuzasidan batafsil ma'lumot berdi. Xususan, belgilangan qoidalar hamda baholash mezonlariga og'ishmay rioya qilish, jarayonlarning shaffofligini to'laqonli ta'minlash hamda hududiy mas'ul shaxslarning vazifalari nimalardan iborat ekanligi atroflicha muhokama qilindi.
Manba: UzA
