Andijonda dual ta'lim modelini joriy etishga bag'ishlangan anjuman o'tkazildi

Andijon davlat chet tillari institutida mamlakatimiz ta'lim tizimiga bag'ishlangan muhim tadbir tashkil etildi. Unda “O'zbekistonda dual ta'lim modelini joriy etish: tendensiyalar va istiqbollar” mavzusida respublika ilmiy-amaliy anjumani bo'lib o'tdi.

Tadbirda turli oliy o'quv yurtlari professor-o'qituvchilari, ilmiy tadqiqotchilar, soha mutaxassislari, investorlar, ish beruvchilar va bitiruvchi talabalar qatnashdi. Anjuman davomida professional, kasb-hunar va umumiy o'rta ta'lim maktablarida, shuningdek, maktabgacha hamda nodavlat ta'lim tashkilotlarida dual ta'lim tizimini qo'llash masalalari ko'rib chiqildi. Shuningdek, sohadagi yutuqlar, mavjud muammolar va ularni hal etish yo'llari muhokama qilindi.

Talabalar va ish beruvchilar muloqoti

Tadbir doirasida oliy o'quv yurtlari vakillari, ish beruvchilar va investorlar o'rtasida to'g'ridan-to'g'ri muloqotlar tashkil etildi. Bitiruvchi yoshlar xo'jalik subyektlari mutasaddilari bilan yuzma-yuz gaplashib, o'z mutaxassisliklari bo'yicha mavjud vakant o'rinlar bilan tanishish imkoniga ega bo'ldilar. Ko'plab iqtidorli talabalar tadbirning o'zidayoq dastlabki suhbatlardan muvaffaqiyatli o'tib, kelgusida ishga joylashish bo'yicha kelishuvlarga erishdilar.

Mehnat yarmarkasi va ko'rgazma

Anjuman doirasida “Zamonaviy ta'lim va karera” ko'rgazmasi va mehnat yarmarkasi ham o'tkazildi. Unda viloyatdagi o'ttizga yaqin davlat va xususiy tashkilotlar, yirik sanoat korxonalari hamda xalqaro maktablar o'zlarining yuzdan ziyod bo'sh ish o'rinlari bilan qatnashdi.

Mutaxassislar nazariy bilim va amaliy tajribani uyg'unlashtiradigan dual ta'lim modeli malakali kadrlar tayyorlashda muhim o'ynashini ta'kidladilar. Mazkur tizim ta'lim jarayoni hamda ishlab chiqarish o'rtasidagi uzviylikni kuchaytirib, yoshlarning mehnat bozorida raqobatbardoshligini oshirishga xizmat qiladi. Mazkur respublika ilmiy-amaliy anjumani ta'limni takomillashtirish va ishlab chiqarish integratsiyasini rivojlantirish yo'lidagi muhim qadam bo'ldi.