AQSHning Yuta universiteti bilan ilm-fan va ta'lim sohasida hamkorlik masalalari muhokama qilindi

Oliy ta'lim, fan va innovatsiyalar vaziri o'rinbosari O'ktam Salomov AQSHning nufuzli ta'lim dargohlaridan biri sanalgan Yuta universiteti xalqaro hamkorlik bo'yicha katta mas'ul xodimi Rendi Makkrillis boshchiligidagi delegatsiyani qabul qildi. Uchrashuvda ikki tomonlama aloqalarni yanada kengaytirish, xususan, muhandislik, konchilik, materialshunoslik va zamonaviy texnologiyalar yo'nalishlarida qo'shma ta'lim dasturlarini hayotga tatbiq etish masalalari atroflicha ko'rib chiqildi. Xorijiy delegatsiya tarkibidan materialshunoslik va konchilik muhandisligi sohalarining yetakchi rahbar hamda ekspertlari o'rin olgan edi.

Global ta'lim va tadqiqotlar universiteti loyihasi

Muloqot davomida O'zbekistonda barpo etilayotgan Global ta'lim va tadqiqotlar universitetini rivojlantirish jarayoniga Yuta universitetining ilg'or akademik dasturlari hamda xalqaro tajribasini tatbiq etish istiqbollari atroflicha muhokama qilindi. Shuningdek, sanoat tarmoqlari va muhandislik sohasi uchun yuqori malakali mutaxassislarni tayyorlash, innovatsion loyihalar va ilmiy tadqiqotlarni birgalikda amalga oshirish masalalari yuzasidan fikr almashildi. Tomonlar ta'lim, ilm-fan hamda ishlab chiqarish tarmoqlari o'rtasidagi integratsiyani yanada kuchaytirish zarurligini qayd etdi.

Akademik almashinuv va hamkorlik istiqbollari

Uchrashuv yakunida talabalar hamda professor-o'qituvchilarning akademik almashinuvini yo'lga qo'yish, qo'shma ta'lim loyihalari va ilmiy tadqiqot tashabbuslarini rivojlantirish har ikki tomon uchun ham manfaatli ekani alohida ta'kidlandi. Eslatib o'tamiz, 1850-yilda tashkil etilgan Yuta universiteti AQSHdagi yetakchi tadqiqot universitetlaridan biri bo'lib, axborot texnologiyalari, tibbiyot, muhandislik, konchilik hamda materialshunoslik yo'nalishlaridagi kuchli ilmiy maktablari bilan xalqaro miqyosda yaxshi tanilgan va nufuzli reytinglarda yuqori o'rinlarni egallab keladi.