Birinchi kurs talabalari uchun yotoqxonaga ariza topshirish boshlandi
2026-2027 o'quv yilida OTMning 1-bosqichiga tavsiya etilganlar talabalar turar joyiga joylashish uchun ariza topshirishi mumkin.
Oliy ta'lim muassasalariga qabul jarayonlari yakunlanib, yangi o'quv yili boshlanishi oldidan hududlardan keladigan yoshlarni yotoqxona bilan ta'minlash masalasi dolzarb ahamiyat kasb etadi. Oliy ta'lim, fan va innovatsiyalar vazirligi ma'lumotiga ko'ra, 2026-2027 o'quv yilida OTMning 1-bosqichiga tavsiya etilgan abituriyentlar uchun talabalar turar joyiga joylashish bo'yicha ariza topshirish xizmati faoliyati yo'lga qo'yildi.
Arizalarni topshirish tartibi
Talabalar turar joyidan joy olishni istagan birinchi kurs talabalari joriy yilning 18-avgustidan boshlab o'z arizalarini Davlat xizmatlari markazlari yoki my.gov.uz portali orqali taqdim etishlari mumkin.
Imtiyozli toifalar va ustuvorliklar
Amaldagi tartibga muvofiq, yotoqxonalarga joylashtirishda ayrim ijtimoiy himoyaga muhtoj qatlamlarga ustuvorlik beriladi. Xususan:
- Yetim va ota-ona qaramog'idan mahrum bo'lgan talabalar;
- Ijtimoiy reyestr, "Temir daftar", "Ayollar daftari" va "Yoshlar daftari"ga kiritilgan yordamga muhtoj oilalar farzandlari;
- I va II guruh nogironligi bo'lgan yoshlar;
- Ayrim nufuzli respublika hamda xalqaro olimpiadalar, tanlovlar va intellektual musobaqalarning g'oliblari hamda qonunchilik hujjatlarida belgilangan boshqa toifadagi talabalar yotoqxonaga imtiyozli asosda joylashish huquqiga egadirlar.
Ta'kidlash joizki, ushbu imtiyozlarga oid ma'lumotlarning aksariyati tegishli davlat axborot tizimlari orqali avtomatik tarzda tekshiriladi. Agar tizimda bunday ma'lumotlar topilmasa, tegishli tasdiqlovchi hujjatlarni taqdim etish talab etilishi mumkin.
Manba: UzA
