Buxoro davlat universitetida yangi o'quv yilidan 10 ta ta'lim yo'nalishi ochiladi

Buxoro davlat universitetida 2026/2027 o'quv yilidan e'tiboran 10 ta yangi hamda istiqbolli ta'lim yo'nalishi ish boshlaydi. Mazkur yo'nalishlar mehnat bozorining real ehtiyojlaridan kelib chiqqan holda tuzilgan bo'lib, ular mamlakatimiz iqtisodiyoti va ijtimoiy tarmoqlari uchun zarur bo'lgan yuqori malakali mutaxassislarni tayyorlashga xizmat qiladi.

Yangi ochiladigan yo'nalishlar va ularning mazmuni

Jumladan, kelgusi o'quv yilidan boshlab oliygohda davlat boshqaruvi, huquqshunoslik hamda sog'liqni saqlash tarmoqlari uchun zamonaviy bilim va amaliy ko'nikmali kadrlarni tayyorlash maqsadida quyidagi mutaxassisliklar yo'lga qo'yiladi:

• Davlat audit
• Yurisprudensiya (masofaviy)
• Davolash ishi
• Tibbiy profilaktika ishi

Davlat akkreditatsiyasi jarayonlari

Universitetda ta'lim sifatini milliy va xalqaro andoidalarga moslashtirish hamda o'quv jarayonlari samaradorligini yuksaltirishga qaratilgan qadamlar tashlanmoqda. Shu maqsadda O'zbekiston Respublikasi Prezidenti Administratsiyasi huzuridagi Ta'lim sifatini ta'minlash milliy agentligi direktori Akram Amirqulov boshchiligidagi mutaxassislar va ekspertlar guruhi mazkur oliygohga tashrif buyurdi.

Tashrif davomida yangidan ochilishi rejalashtirilgan o'quv dasturlari maxsus davlat akkreditatsiyasidan o'tkazilmoqda. Ekspertlar guruhi universitetning mavjud o'quv dasturlari, professor-o'qituvchilarning ilmiy salohiyati, moddiy-texnik ta'minoti, laboratoriya hamda klinik infratuzilmasi, shuningdek, raqamli ta'lim muhitini xalqaro sifat mezonlari asosida har tomonlama baholamoqda.

Shuningdek, mazkur jarayonlar doirasida universitet rahbariyati, soha vakillari hamda kadrlar buyurtmachilari ishtirokida uchrashuvlar tashkil etildi. Ushbu muloqotlarda yangi ta'lim dasturlarining dolzarbligi, ularning mehnat bozori talablariga mos kelishi va raqobatbardosh kadrlar tayyorlash imkoniyatlari atroflicha muhokama qilindi. O'tkazilayotgan akkreditatsiya ishlari oliygohda sifatli ta'lim dasturlarini joriy etishga qaratilgan islohotlarning muhim bosqichi bo'lib xizmat qiladi.