Buxoroda Avstriya universiteti bilan hamkorlikda turizm yo'nalishida loyihalar rejalashtirilmoqda
Buxoro viloyatida Avstriyaning Krems Amaliy fanlar universiteti bilan ta'lim, turizm va tadbirkorlik yo'nalishlarida hamkorlik masalalari muhokama qilindi.
Avstriyaning Krems Amaliy fanlar universiteti asoschisi hamda kuzatuv Kengashi raisi, professor Xayns Boyer boshchiligidagi delegatsiya Buxoroda bo'lib, viloyat hokimi Botir Zaripov bilan muzokara o'tkazdi. Uchrashuvda turizm, tadbirkorlik va yosh mutaxassislarni tayyorlashda o'zaro hamkorlik aloqalarini yo'lga qo'yish masalalari diqqat markazida bo'ldi. Shuningdek, qo'shma ta'lim dasturining amaliy natijalari, o'quv jarayoniga xalqaro standartlarni tatbiq etish hamda amaliyot dasturlarini yanada takomillashtirish muhokama qilindi.
Muloqot davomida ta'lim sifatini yuksaltirish, raqamli yechimlarga tayangan holda baholash tizimini yaxshilash, professor-o'qituvchilar almashinuvini yo'lga qo'yish hamda xalqaro grant loyihalarini birgalikda ilgari surish kabi masalalar ham ko'tarildi. Tomonlar O'zbekiston va Avstriya o'rtasidagi ta'limiy aloqalarning mustahkamlanishi mamlakat yoshlarini global turizmning yangi bosqichlariga tayyorlashda muhim ahamiyat kasb etishini alohida ta'kidladilar.
Buxoroda dual ta'limga asoslangan loyihalar
Professor Xayns Boyer Buxoroda oliy ta'lim sohasiga qaratilayotgan e'tiborni yuqori baholab, turizm va tibbiyot tarmoqlari uchun xalqaro standartlarga mos ravishda malakali kadrlar yetkazib berish bo'yicha o'z taklif va mulohazalarini bildirdi. U Buxoroda turizm, mehmonxona xo'jaligi hamda ta'limni o'zaro birlashtirgan yirik loyiha rejalashtirilayotgani va u dual ta'limga asoslanishini qayd etdi.
Universitetlararo hamkorlik yo'nalishlari
- Vena shahrida joylashgan Krems Amaliy fanlar universiteti va Buxoro davlat universiteti o'rtasida talabalar almashinuvi yo'lga qo'yilmoqda.
- Qo'shma tadqiqotlar va akademik dasturlar ishlab chiqilmoqda.
- O'qituvchi kadrlar almashinuvi hamda ilmiy-tadqiqot faoliyati kengaytirilmoqda.
- O'zaro manfaatli nashrlar va ilmiy materiallar almashinuvi ta'minlanmoqda.
- Talabalar hamda bitiruvchilar uchun maxsus amaliyot dasturlari tashkil etilmoqda.
- Media va axborot resurslarini ishlab chiqish borasida hamkorlik qilinmoqda.
Manba: UzA
