Davlat va huquq institutiga inson huquqlari va Xitoyga oid yangi adabiyotlar topshirildi

Kitobxonlikni rivojlantirish chora-tadbirlari

2026-yil 15-yanvarda qabul qilingan davlat rahbarining “Kitobxonlik madaniyatini rivojlantirish va aholi o'rtasida kitob o'qishga qiziqishni oshirish chora-tadbirlari to'g'risida”gi qaroriga muvofiq, mamlakatimizda kitobxonlik madaniyatini targ'ib qilish, ta'lim dargohlari va kutubxonalarni sohaviy adabiyotlar bilan ta'minlash ko'zda tutilgan. Ushbu hujjatda 2026-2030-yillarda aholining kitobxonlik darajasini yiliga o'rtacha 10 ta kitobga yetkazish belgilangan.

Mazkur vazifalar ijrosiga hissa qo'shish maqsadida Inson huquqlari bo'yicha O'zbekiston Respublikasi Milliy markazi tomonidan Davlat va huquq institutida ma'rifiy tadbir tashkil etildi.

Institut fondiga topshirilgan adabiyotlar

Tadbir doirasida Xitoyning mamlakatimizdagi elchixonasi Inson huquqlari uyiga beg'araz taqdim etgan adabiyotlarning bir qismi Davlat va huquq institutiga topshirildi. Jumladan, institut fondiga Xitoy yetakchisi Si Szinpinning asarlari, inson huquqlari yo'nalishidagi nashrlar, shuningdek, Xitoy madaniyati va adabiyotiga bag'ishlangan jami 28 nomdagi 56 dona kitob hamda 6 ta elektron disk taqdim qilindi.

Tadbirda so'z olganlar mazkur tashabbus Prezident qarorida belgilangan vazifalarga hamohangligini ta'kidlashdi. Taqdim etilgan adabiyotlar institutning ilmiy xodimlari, yosh olimlar va tadqiqotchilar uchun inson huquqlari sohasidagi zamonaviy yondashuvlarni tahlil qilish, xalqaro tajribani o'rganish hamda ilmiy izlanishlarni boyitishda muhim manba bo'lib xizmat qilishi qayd etildi.

Ilmiy-ma'rifiy hamkorlik istiqbollari

Davlat va huquq instituti direktori Murodjon Turg'unov yangi adabiyotlarning ilmiy-amaliy ahamiyati haqida gapirib, O'zbekiston va Xitoy o'rtasidagi strategik hamkorlikni mustahkamlashdagi o'rnini alohida e'tirof etdi. Shuningdek, u Inson huquqlari bo'yicha O'zbekiston Respublikasi Milliy markazi hamda Xitoyning O'zbekistondagi elchixonasiga minnatdorlik bildirdi.

Uchrashuv davomida O'zbekiston va Xitoy o'rtasidagi ilmiy-ma'rifiy aloqalarni yanada rivojlantirish, o'zaro tajriba almashish va qo'shma loyihalarni amalga oshirish masalalari yuzasidan ham fikr almashildi.