"Ijtimoiy ish" yo'nalishi bitiruvchilari va oliygoh vakillari ishtirokida ochiq muloqot tashkil etildi

Mamlakatimizda ijtimoiy himoya tizimini rivojlantirish va sohani malakali kadrlar bilan ta'minlash borasida qator ishlar amalga oshirilmoqda. Oliy ta'lim muassasalarida "ijtimoiy ish" yo'nalishining tashkil etilishi ham shunga qaratilgan bo'lib, hozirda bu borada mutaxassislar tayyorlanmoqda, shuningdek tadqiqotchilar uchun zarur sharoitlar yaratilmoqda.

Bitiruvchilarni bandlik bilan ta'minlash masalalari

Ijtimoiy himoya milliy agentligi direktori o'rinbosari S.Abdullayev ishtirokida 17 ta oliy ta'lim muassasasining "ijtimoiy ish" yo'nalishida tahsil olayotgan bitiruvchi talabalari hamda professor-o'qituvchilari bilan uchrashuv bo'lib o'tdi. Muloqot davomida yosh mutaxassislarni ish bilan ta'minlash masalalari muhokama qilindi. Xususan, talabalarning mahallalarda ijtimoiy xodim lavozimida faoliyat yuritishga bo'lgan qiziqishi hamda istaklari o'rganilib, ularga amaliy yordam ko'rsatish yo'llari tushuntirildi.

Takliflar va hamkorlik yo'nalishlari

Tadbir davomida ta'lim, amaliyot va soha o'rtasidagi integratsiyani yanada kuchaytirish, kadrlar siyosati, akademik hamkorlik hamda ilmiy-tadqiqot ishlarini rivojlantirish bo'yicha fikr almashildi. Mutaxassislarni qo'llab-quvvatlash, rag'batlantirish va ijtimoiy himoya tizimiga raqobatbardosh kadrarni jalb etish yuzasidan 25 dan ortiq takliflar bildirildi.

Ushbu takliflarni bosqichma-bosqich hayotga tatbiq etish orqali kelgusida mahallalardagi ijtimoiy xizmatlar ko'rsatish sifatini yanada oshirish ko'zda tutilgan.