Farg'onada o'qituvchilarni tuni bilan navbatchilikka majburlagan direktor ishdan olindi
Farg'ona viloyatida o'qituvchilarni lavozim majburiyatiga kirmaydigan tun-u kun navbatchilikka jalb qilgan maktab direktori vazifasidan ozod etildi.
Buvayda tumanidagi 37-umumta'lim maktabi direktori vazifasini vaqtincha bajaruvchi pedagoglarni tun-u kun navbatchilik qilishga majburlagani aniqlandi va u egallab turgan vazifasidan ozod etildi. Bu haqda Farg'ona viloyati Maktabgacha va maktab ta'limi boshqarmasi ma'lum qildi.
Aniqlanishicha, maktab rahbarining buyrug'i bilan o'qituvchilar 25-dekabrdan 6-yanvarga qadar navbatchilikka jalb qilingan. Pedagoglar rasman e'lon qilingan besh kunlik dam olish kunlarida ham ikki smenada ta'lim muassasasida qolishga majbur etilgan. Boshqarma mazkur holatni o'rganib chiqib, amaldagi tartiblarga zid ravishda o'qituvchilarga ularning vazifasiga kirmaydigan yumushlar yuklatilganini tasdiqlagan.
Viloyat Maktabgacha va maktab ta'limi boshqarmasining 2026-yil 6-yanvardagi buyrug'iga asosan 37-maktab direktori vazifasini vaqtincha bajarib kelgan X.N. bilan tuzilgan shartnoma bekor qilindi. Shuningdek, boshqa tizim rahbarlari kelgusida bunday qoidabuzarliklarga yo'l qo'ymasliklari yuzasidan qat'iy ogohlantirilgan.
Manba: Kun.uz
