Farmatsevtika texnik universiteti xalqaro standartlar asosida kadrlar tayyorlamoqda
Tashkent Pharma Park klasteri tarkibidagi Farmatsevtika texnik universiteti Buyuk Britaniya va Koreya dasturlari asosida ta'lim bermoqda.
Prezident Shavkat Mirziyoyev tashabbusi bilan 2020 yil 28 yanvardagi PQ-4574-son qaror ijrosi doirasida “Tashkent Pharma Park” innovatsion ilmiy-ishlab chiqarish farmatsevtika klasteri barpo etilgan edi. Mazkur hududda yuqori malakali mutaxassislarni tayyorlash maqsadida Farmatsevtika texnik universiteti o'z faoliyatini boshlagan. OTMning eng muhim jihati uning yetakchi xalqaro oliygohlar o'quv dasturlari asosida faoliyat yuritishidir.
Ta'lim yo'nalishlari va dasturlar
Universitetda darslar to'liq ingliz tilida olib boriladi, bu esa yoshlarga jahon mehnat bozorida munosib raqobat qilish imkonini beradi. Bugungi kunda quyidagi yo'nalishlar bo'yicha kadrlar tayyorlanmoqda:
- Farmatsiya – De Montfort universiteti (Buyuk Britaniya)
- Biotibbiyot – Sunderland universiteti (Buyuk Britaniya)
- Biokimyo – Sunderland universiteti (Buyuk Britaniya)
- Biznes boshqaruvi – De Montfort universiteti (Buyuk Britaniya)
- Biznes data analitika – De Montfort universiteti (Buyuk Britaniya)
- Sanoat farmatsiyasi va kosmetika – Yonsei universiteti (Koreya)
Amaliyot va xalqaro imkoniyatlar
Ta'lim jarayonida dual ta'lim tizimi tatbiq etilgan bo'lib, talabalar o'qish jarayonida “Tashkent Pharma Park” klasteridagi xalqaro ishlab chiqarish korxonalarida o'z amaliyotlarini o'tab boradilar. Shu tariqa olingan nazariy bilimlar bevosita amaliyotda mustahkamlanadi. Shuningdek, talabalar yozgi maktablar, xorijiy amaliyotlar hamda xalqaro almashinuv dasturlarida faol ishtirok etish imkoniyatiga ega. Bu esa ularning xalqaro tajriba orttirishi hamda jahon ilmiy hamjamiyatiga qo'shilishi uchun xizmat qiladi.
Qulayliklar va yangi binolar
Qayd etish joizki, mazkur oliygoh hayot fanlari yo'nalishi bo'yicha Buyuk Britaniya diplomini taqdim etuvchi MDH hududidagi yagona ta'lim maskani hisoblanadi. E'tiborli jihati, farmatsiya yo'nalishida magistr darajasiga ega bo'lish uchun endilikda 7 yil emas, atigi 5 yil kifoya qiladi. De Montfort University ning MSci Pharmacy dasturi aynan 5 yilda Britaniya magistri darajasini olish imkonini beradi. Hozirgi kunda universitet uchun zamonaviy o'quv binosi Koreyaning Hanshin, Samsung va Hyundai kompaniyalari konsorsiumi tomonidan barpo etilmoqda.
Manba: Kun.uz
