Germaniyada o'zbekistonlik pedagog va olimlarning birinchi qurultoyi bo'lib o'tdi
Germaniyadagi O'zbekiston elchixonasida vatandosh pedagoglar, olimlar va ta'lim mutaxassislarining ilk qurultoyi o'tkazildi.
Mamlakatimizning Germaniyadagi elchixonasida ushbu davlatda yashab kelayotgan o'zbekistonlik pedagoglar, ta'lim mutaxassislari, olimlar va ziyolilarning birinchi qurultoyi tashkil etildi. Tadbirning ochilish marosimida O'zbekistonda ta'lim, ilm-fan va xorijdagi vatandoshlar bilan aloqalarni rivojlantirish davlat siyosatining ustuvor yo'nalishlaridan biri ekani ta'kidlandi.
Hamkorlik va ma'rifiy tashabbuslar
Qurultoy doirasida Germaniyadagi vatandosh o'qituvchilar o'rtasida aloqalarni mustahkamlash, yosh avlodga o'zbek tili, adabiyoti hamda milliy madaniyatini o'rgatish masalalari muhokama qilindi. Shuningdek, ma'naviy-ma'rifiy ishlarni samarali tashkil etish yuzasidan fikr almashildi. Anjumanda O'zbekiston Respublikasi Fanlar akademiyasining “Germaniyada Turkiston adabiyoti” ilmiy loyihasi vakillari hamda “Jadidlar izidan” respublika tanlovi g'oliblari ham qatnashdi.
Jumladan, loyiha rahbari, professor Shahnoza Madayeva “Germaniyada Turkiston adabiyoti” to'plamining birinchi jildi taqdimotini o'tkazdi. Tadbirda jadidchilik harakati va o'zbek ma'rifatparvarlari merosini Germaniya ilmiy muhitida o'rganish borasidagi ishlar haqida so'z yuritildi. Shuningdek, professor Noibaxon Mamadaliyeva va “Jadidlar izidan” tanlovi hakamlar hay'ati raisi, doktor Bahrom Irzayev ma'ruza qilib, zamonaviy ta'lim va milliy ma'rifat masalalariga e'tibor qaratdi.
Jadidlar merosi va yoshlar tarbiyasi
Bahrom Irzayevning ta'kidlashicha, mazkur tashrif va uchrashuvlar ishtirokchilarni ilm-ma'rifatga, milliy tarix hamda ma'naviy merosni chuqur o'rganishga chorladi. “Jadidlar izidan” tanlovining asosiy maqsadi jadid taraqqiyparvarlarining g'oyalarini yoshlar ongiga singdirish, ularni Vatan oldidagi mas'uliyatni anglaydigan bilimli avlod sifatida tarbiyalashdan iboratdir.
Tadbir yakunida “Jadidlar izidan” tanlovi g'oliblari jadidlar merosiga asoslangan taqdimotlar va badiiy chiqishlarni namoyish etdi. O'quvchilar ijrosidagi Vatan haqidagi she'rlar yig'ilganlar e'tiboriga havola etildi.
Manba: UzA
