Birinchi sinfga qabul jarayonida arizalarni rad etish sabablari ma'lum bo'ldi
2026/2027 o'quv yili uchun 1-sinfga qabul qilishda arizalar qanday holatlarda rad etilishi tushuntirildi.
2026/2027 o'quv yili uchun 1-sinfga qabul jarayonlari davom etmoqda va shu munosabat bilan ota-onalarni qiziqtirgan masalalarga aniqlik kiritildi.
Navbat va qabul qoidalari
my.maktab.uz platformasi orqali maktabga borish uchun belgilangan navbat sanasi o'tmasdan turib uni o'zgartirib bo'lmaydi. Agar uchrashuv vaqti belgilangan bo'lsa, uni faqat belgilangan kun hamda vaqt o'tib ketganidan keyingina qayta tanlash yoki yangi navbat olish imkoniyati yuzaga keladi.
Qaysi holatlarda ariza rad etiladi?
Qabul komissiyasi quyidagi holatlarda bolani umumta'lim maktabiga qabul qilishni rad etishga haqli:
- Bolaning tibbiy ma'lumotnomasida maktabda ta'lim olishi tavsiya etilmagan bo'lsa
- Bola tanlangan ta'lim tilida boshlang'ich so'zlashuv ko'nikmasiga ega bo'lmasa
- So'rovnomada ko'rsatilgan ma'lumotlar noto'g'ri ekani aniqlansa
Bildirilishicha, sanab o'tilgan sabablardan boshqa asoslar bilan bolalarni umumta'lim maktabiga qabul qilishni rad etish qat'iyan taqiqlanadi.
Manba: UzA
