Huquqni muhofaza qiluvchi organlar OTMlari kursant va talabalari uchun maxsus trening o'tkazildi

Yoshlar ishlari agentligi hamda Huquqni muhofaza qiluvchi organlarning oliy ta'lim tashkilotlari konsorsiumi hamkorligida yoshlarning kasbiy faoliyatida raqamli texnologiyalar, sun'iy intellekt va innovatsion yondashuvlardan foydalanish kompetensiyalarini rivojlantirishga qaratilgan seminar-trening tashkil etildi.

Ishtirokchilar va dastlabki kun mashg'ulotlari

Tadbirda huquqni muhofaza qiluvchi idoralarga qarashli beshta OTM, jumladan, Jamoat xavfsizligi universiteti, Ichki ishlar vazirligi akademiyasi, Bojxona qo'mitasi Bojxona instituti, Huquqni muhofaza qilish akademiyasi hamda Favqulodda vaziyatlar vazirligi akademiyasidan jami ikki yuzdan ortiq kursant va talaba ishtirok etmoqda.

Treningning ilk kunida rasmiy ochilish marosimi o'tkazilib, yoshlar uchun turli psixologik treninglar va jamoada ishlash mashg'ulotlari tashkil etildi. Shuningdek, ishtirokchilar o'zlari tahsil olayotgan ta'lim maskanlari haqida tayyorlagan qiziqarli taqdimotlar va videoroliklarni namoyish qilishdi.

Ikkinchi kundagi muhim ma'ruzalar va amaliy tadbirlar

Ikkinchi kuni davlat boshqaruvi va zamonaviy rahbarlikning ilmiy hamda amaliy jihatlariga bag'ishlangan ma'ruzalar tinglandi. Jumladan, davlat xizmatchisining media-imidjini yaratish strategiyalari, yoshlarga oid davlat siyosatining innovatsion yondashuvlari, shuningdek, kiberxavfsizlik va raqamli gigiyena qoidalariga oid mavzularda muhokamalar bo'lib o'tdi.

Bundan tashqari, dastur doirasida harbiy-kvest amaliy mashg'ulotlari, karaoke-batl tashkil etilib, Vatanparvarlik ruhidagi "Jasorat" filmi namoyish qilindi va ijodkorlar bilan uchrashuvlar o'tkazildi. Kelgusida ham mazkur ta'lim muassasalari yoshlarining liderlik va zamonaviy texnologiyalardan foydalanish ko'nikmalarini oshirishga qaratilgan nazariy-amaliy mashg'ulotlar hamda guruhlararo musobaqalarni davom ettirish rejalashtirilgan.