JIDUda tahsil olayotgan tojikistonlik talaba ta'lim jarayonlari haqida so'zlab berdi

Tojikistonning Tursunzoda shahridan bo'lgan Muhammad Rafiq Qobilov bugungi kunda O'zbekistondagi nufuzli oliy ta'lim muassasalaridan biri – Jahon iqtisodiyoti va diplomatiya universitetida tahsil olmoqda. Uning so'zlariga ko'ra, oilada kenja o'g'il bo'lgani sababli dastlab vataniga yaqinroq bo'lgan qardosh O'zbekistonda o'qishni tanlagan.

Universitet tanlovi va ta'lim jarayoni

JIDU haqida maktab paytidayoq eshitgan va akasi orqali barcha ma'lumotlarni topgan talaba xalqaro munosabatlar yo'nalishiga qiziqqani uchun shu dargohni tanlagan. Otasi bilan birgalikda kelib, universitetdagi qulayliklar va o'qish darajasi bilan tanishib chiqqan. O'zbekistondagi oliy o'quv yurtlarini nafaqat Markaziy Osiyodagi yetakchi dargohlar, balki Yevropa yoki Amerika universitetlari bilan ham bemalol qiyoslash mumkinligini ta'kidlab, JIDUda kutganidan ham ko'proq bilim olayotganini qayd etdi. Universitetda darsga qatnashish, imtihon topshirish va vazifalarni bajarish jarayonlari yuqori darajada tashkil etilgan.

Moslashish va kelajakdagi rejalar

Toshkent shahri uning uchun ikkinchi vatan kabidir. O'zbek va tojik xalqlarining madaniyati, qadriyat va urf-odatlari o'xshashligi uchun moslashish jarayoni qiyin kechmagan. Dastlabki bosqichda o'zbek tili grammatikasini o'zlashtirishda biroz qiyinchiliklar bo'lgan bo'lsa-da, birinchi chorakda til o'rganilgan va kursdoshlarning yordami bilan barcha to'siqlar yengib o'tilgan.

O'qishni tugatgach, Tojikistonga qaytib harbiy xizmatni o'tashni, shundan so'ng esa ta'limni Yevropada, jumladan Angliya yoki Italiyada magistraturada davom ettirishni rejalashtirgan.