Jizzax politexnika instituti Vengriyaning Obuda universiteti tajribasi asosida transformatsiya qilinadi
Jizzax politexnika instituti delegatsiyasi Vengriyaning Obuda universitetida bo'lib, xalqaro hamkorlik va ta'lim sifatini oshirish masalalarini muhokama qildi.
Prezident Shavkat Mirziyoyev tomonidan 2025 yil 2 dekabr kuni Jizzax viloyati Xalq deputatlari Kengashining navbatdan tashqari sessiyasida berilgan topshiriqlar ijrosi doirasida oliy ta'lim tizimida muhim amaliy qadamlar tashlanmoqda. Jumladan, Jizzax politexnika instituti rektori, professor, fan doktori Alisher Usmonqulov boshchiligidagi delegatsiya Vengriyaning nufuzli Obuda universitetiga xizmat safari uyushtirdi.
Boshqaruvni raqamlashtirish va yangi lavozim
Uchrashuvlar davomida universitet boshqaruvini raqamlashtirish, strategik rejalashtirish, ta'lim sifati monitoringi hamda samarali boshqaruv modellarini joriy etish masalalari muhokama qilindi. Obuda universiteti tajribasiga tayangan holda, Jizzax politexnika institutini transformatsiya qilish jarayoni boshlandi. Xususan, 2026/2027 o'quv yilidan boshlab institutda strategik rivojlanish va raqamli transformatsiya bo'yicha alohida prorektor lavozimini joriy etish rejalashtirildi. Bu tashabbus ta'lim maskani boshqaruvini zamonaviy talablar asosida qayta qurishga xizmat qiladi.
Ilg'or yo'nalishlar va laboratoriyalar bilan tanishuv
Tashrif doirasida delegatsiya a'zolari axborot texnologiyalari, sun'iy intellekt, muhandislik, arxitektura, biznes va boshqaruv yo'nalishlaridagi fakultetlar faoliyatini yaqindan o'rgandi. Amaliyotga yo'naltirilgan ta'lim jarayonlari, ilmiy laboratoriyalar hamda innovatsion yondashuvlar ta'lim mazmunini yangilashda muhim tajriba sifatida baholandi. Shuningdek, Alba Regia texnika fakulteti hamda fan va innovatsiyalar parki faoliyati orqali oliy ta'lim, ilm-fan va ishlab chiqarish integratsiyasining samarali modeli ko'zdan kechirildi.
Kelgusidagi rejalar va hamkorlik yo'nalishlari
Safar yakunida moliyaviy barqarorlikni ta'minlash, ilmiy natijalarni tijoratlashtirish, startap tashabbuslarini qo'llab-quvvatlash va investitsiyalarni jalb etish bo'yicha ilg'or tajribalarni qo'llash kelishib olindi. Tomonlar qo'shma ta'lim dasturlarini yo'lga qo'yish, professor-o'qituvchilar hamda talabalar almashinuvini kengaytirish, shuningdek, xalqaro grant va stipendiya dasturlarida ishtirokni yanada kuchaytirish bo'yicha aniq yo'nalishlarni belgilab oldilar.
Manba: UzA
