Ma'mun universitetida xalqaro anjuman va yangi vivariy laboratoriyasi ochildi
Urganchdagi Ma'mun universitetida tibbiyot yo'nalishidagi xalqaro konferensiya o'tkazilib, zamonaviy vivariy laboratoriyasi ishga tushirildi.
Urganch shahridagi Ma'mun universitetida "Zamonaviy tibbiyotning dolzarb muammolari: nazariya va amaliyot" mavzusiga bag'ishlangan birinchi xalqaro ilmiy-amaliy konferensiya bo'lib o'tdi. O'zbekiston Respublikasi Sog'liqni saqlash vazirligi va universitet hamkorligida tashkil etilgan ushbu nufuzli tadbirda mamlakatimiz hamda xorijiy davlatlardan yetakchi olimlar, professor-o'qituvchilar, amaliyotchi shifokorlar va yosh tadqiqotchilar ishtirok etdi.
Anjumanda Rossiya, Turkiya, Gruziya va boshqa davlatlardan kelgan mutaxassislar ma'ruzalar bilan qatnashdi. Yalpi majlisda zamonaviy tibbiyotning dolzarb masalalari, jumladan, infeksion kasalliklar, jarrohlik, onkologiya, pediatriya hamda raqamli tibbiyot yo'nalishlaridagi ilmiy ishlanmalar taqdim etildi. Shuningdek, tadbir doirasida bir nechta sho'balar faoliyat yuritib, klinik tibbiyot, jamoat salomatligi, biotexnologiya va innovatsion pedagogika bo'yicha muhokamalar tashkil etildi. Bu esa ilm-fan va amaliyot integratsiyasini mustahkamlashga xizmat qildi.
Yangi vivariy laboratoriyasi
Konferensiya bilan uyg'un holda universitetda zamonaviy vivariy laboratoriyasi rasman ishga tushirildi. Mutaxassislarning ta'kidlashicha, mazkur laboratoriya quyidagi imkoniyatlarni yaratadi:
- tibbiyot yo'nalishidagi talabalar uchun amaliy mashg'ulotlarni kuchaytiradi
- ilmiy-tadqiqot ishlarini olib borish imkoniyatini kengaytiradi
- eksperimental tibbiyot sohasida zamonaviy infratuzilma yaratadi
Laboratoriyada quyonlar, kalamushlar va baqalar kabi tajriba hayvonlari mavjud bo'lib, ular orqali fiziologik hamda patologik jarayonlarni o'rganish imkoniyati yaratilgan. Bundan tashqari, bu maskan gistologik, PCR, gematologik va biokimyoviy tadqiqotlarni o'tkazish uchun zarur bo'lgan zamonaviy uskunalar bilan to'liq ta'minlangan.
Manba: Kun.uz
