Ma'mun universitetining Tibbiyot fakultetida zamonaviy vivariy ish boshladi

Ma'mun universiteti Tibbiyot fakulteti qoshida zamonaviy vivariy tashkil etilib, o'z ishini boshladi. Ushbu maskan ta'lim muassasasida ilmiy-tadqiqot jarayonlarini rivojlantirish, talabalarning olgan nazariy bilimlarini amaliyotda mustahkamlash hamda tibbiyot yo'nalishidagi ilg'or tajribalarni o'rganishda asosiy baza vazifasini bajaradi.

Ma'lumki, vivariy tajriba o'tkazish maqsadida hayvonlarni boqish va ko'paytirish uchun mo'ljallangan maxsus maskan bo'lib, u ilm-fan va laboratoriyalar huzurida ochiladi. Tibbiyot, veterinariya hamda biologiya sohalaridagi muhim kashfiyotlar, turli dori vositalarining ta'sirini o'rganish jarayonlari aynan shunday muassasalarsiz tasavvur etib bo'lmaydi.

Amaliyot va ilm-fan uyg'unligi

Endilikda mazkur markazning ochilishi tufayli universitet talabalari o'zlarining tajribaviy tadqiqotlarini bevosita olib borish imkoniyatiga ega bo'ldilar. Bu esa yoshlarning zamonaviy va ilmiy yondashuvlar asosida faoliyat yuritishiga zamin yaratadi.

Yangi vivariyning ishga tushirilishi ta'lim dargohida tibbiy ta'lim sifatini yanada yuqori bosqichga ko'tarish hamda amaliyot bilan ilm-fanni bir-biriga uzviy bog'lash yo'lidagi muhim qadamlardan biri bo'ldi. Mazkur imkoniyatlar kelgusida raqobatbardosh, yetuk va zamonaviy bilim darajasiga ega tibbiyot kadrlarini tayyorlab chiqarishga xizmat qiladi.