Maxsus maktab-internatda ta'lim berish va alohida ehtiyojli bolalar bilan ishlash jarayoni

Toshkent shahrining Qorasuv mavzesida joylashgan 105-sonli maxsus maktab-internat hovlisida kun erta tongdan boshlanadi. Mazkur maskan aqliy rivojlanishida yengil va o'rta darajadagi nuqsoni bor, alohida ta'lim ehtiyojlari bo'lgan bolajonlarga mo'ljallangan bo'lib, ularni jamiyatga moslashtirishga xizmat qiladi. Ertalab soat 8:30 da maktab tarbiyachisi bolalarni boshlang'ich sinf o'qituvchisi Nargiza opa Hayitoxunovaga topshirishi bilan darslar boshlanadi. Darsdan keyin ham internatda qoladigan o'quvchilar tarbiyachilar nazoratida uy vazifalarini bajarib, qo'shimcha mashg'ulotlar bilan shug'ullanadi.

Sabr va samimiyat talab etiladigan jarayon

Sinfxonaga kirganda o'zgacha muhit seziladi. “Ona tili” darsida ustoz unli va undosh tovushlarni, lotin alifbosidagi harflarni o'quvchilarga alohida yondashuv asosida tushuntiradi. Aqliy rivojlanishi sekinlashgan bolalarga bilim berish oddiy metodika bilan cheklanmay, cheksiz sabr va samimiyatni talab etadi. Bolalarning xarxashasi yoki e'tiborsizligiga ustoz aslo ovoz ko'tarmaydi. Ota-onalarning e'tirof etishicha, murg'ak qalblar Nargiza opani ko'rganda yugurib kelib quchoqlaydi.

36 yillik tajriba va darslik muallifligi

“O'tgan o'quv yilida birinchi sinfga kelganida ancha qiyin bo'lgan edi. Ota-onalar kelib, farzandlaridagi kichik bo'lsa-da yutuqni ko'rib quvonganda mehnatimiz besamar ketmaganini his qilaman”, - deydi ustoz. Nargiza opa 36 yillik tajribaga ega pedagog bo'lish bilan birga, defektolog, logoped va 2-sinflar uchun mo'ljallangan maxsus “Ona tili” darsligining hammuallifidir. Shuningdek, u 15 yil davomida tibbiy-pedagogik komissiyada ham faoliyat yuritgan.