Muddatli harbiy xizmatni o'tayotganlar uchun oliy ta'lim olish imkoniyati yaratiladi
2026/2027-o'quv yilidan boshlab muddatli harbiy xizmatdagi askarlar masofaviy ta'lim shakliga o'qishga kirish va imtiyozli ta'lim kreditidan foydalanish imkoniyatiga ega bo'ladi.
Mamlakatimizda yoshlarni har tomonlama qo'llab-quvvatlash hamda Qurolli Kuchlar safida xizmat qilish nufuzini oshirishga qaratilgan islohotlar doirasida muhim qaror qabul qilindi. O'zbekiston Respublikasi Prezidentining 2026-yil 7-apreldagi PQ-134-son qaroriga asosan, muddatli harbiy xizmatni o'tayotgan askarlar uchun ta'lim olish imkoniyatlari sezilarli darajada kengaytirilmoqda.
Yangi o'quv yilidan joriy etiladigan tartib
Qarorga ko'ra, 2026/2027-o'quv yilidan boshlab muddatli harbiy xizmatni o'tayotgan yigitlar oliy ta'lim muassasalarining bakalavriat bosqichi masofaviy ta'lim shakliga abituriyent sifatida ro'yxatdan o'tish huquqiga ega bo'ladilar. Shuningdek, ular belgilangan kirish imtihonlarida to'g'ridan-to'g'ri ishtirok etishlari va muvaffaqiyatli o'tgan taqdirda talabalikka qabul qilinishlari mumkin.
Imtiyozli kredit va yaratiladigan shart-sharoitlar
Sinov natijalariga ko'ra to'lov-kontrakt asosida o'qishga tavsiya etilgan harbiy xizmatchilarga amaldagi tartib asosida imtiyozli ta'lim krediti ajratib beriladi. Mazkur chora-tadbirlar yoshlarni harbiy xizmatga yanada kengroq jalb etish, ularning o'z salohiyatini ro'yobga chiqarishi hamda kasbiy va shaxsiy rivojlanishi uchun qulay sharoitlar yaratishga xizmat qiladi.
Manba: UzA
