Navoiy davlat universiteti va Bucheon universiteti hamkorlikni kengaytirmoqda
Navoiy davlat universiteti va Koreyaning Bucheon universiteti 2027-yildan qo'shma ta'lim dasturlarini ochish bo'yicha kelishuvga erishdi.
Bucheon universiteti rektori, professor Xan Chyung Suchning taklifiga binoan Navoiy davlat universiteti rektori, professor Muhiddin Kalonov Koreya Respublikasida xizmat safarida bo'ldi. Tashrif doirasida u universitetning yangi Sosa kampusi ochilish marosimi hamda global akademik hamkorlikka bag'ishlangan xalqaro konferensiyada ishtirok etdi.
O'n oltidan ortiq davlat vakillari qatnashgan mazkur xalqaro anjumanda universitetlararo aloqalarni rivojlantirish, akademik mobillikni ta'minlash, qo'shma ta'lim dasturlarini yo'lga qo'yish hamda ilmiy-tadqiqot yo'nalishidagi hamkorlik masalalari muhokama qilindi.
Yangi qo'shma dasturlar va loyihalar
Navoiy davlat universiteti rektori M.Kalonovning ta'kidlashicha, ikki oliy ta'lim muassasasi o'rtasida 2027-yildan boshlab yangi qo'shma ta'lim dasturlarini ochish, xususan, dastlab bakalavriat bosqichida ta'lim berish hamda ilmiy-innovatsion loyihalarni birgalikda amalga oshirish yuzasidan kelishuvga erishilgan. Shuningdek, tomonlar professor-o'qituvchilar hamda talabalar almashinuvini yanada kengaytirishni rejalashtirgan. Bundan tashqari, Navoiy davlat universitetida maxsus Sport ilmiy-reabilitatsiya markazini tashkil etish ham ko'zda tutilgan.
Tadbir yakunida ishtirokchilar joriy yilning 9-sentabr kuni Navoiy davlat universitetida o'tkaziladigan Koreys tili va koreys madaniyati markazining ochilish marosimiga rasman taklif etildi.
Manba: UzA
