Nufuzli xorijiy OTMda ilmiy daraja olganlarga ipoteka krediti beriladi
Nufuzli xorijiy oliy ta'lim tashkilotlarida ilmiy daraja olgan yosh mutaxassislarga uy-joy sotib olish uchun ipoteka krediti ajratiladi.
Hukumat qaroriga asosan nufuzli xalqaro reyting tashkilotlarining ro'yxatiga kiritilgan xorijiy oliy ta'lim muassasalarida ilmiy darajaga ega bo'lgan yosh mutaxassislarga uy-joy sotib olish maqsadida ipoteka kreditini ajratish tartibi belgilandi.
Kredit shartlari va miqdori
Tasdiqlangan nizomga ko'ra, O'zbekiston hududidagi birlamchi uy-joy bozoridan uy sotib olish uchun bazaviy hisoblash miqdorining 2150 baravarigacha mablag' ajratiladi. Mazkur kredit 10 yil muddatga, tijorat banklari hisobidan yillik 14 foiz stavkada va har oyda qaytarish sharti bilan beriladi. Bunda ajratiladigan kredit sotib olinayotgan uy-joy qiymatining 80 foizidan oshmasligi talab etiladi.
Talabgorlarga qo'yiladigan shartlar
Ipoteka krediti faqatgina quyidagi barcha mezonlarga javob beradigan fuqarolarga taqdim etiladi:
- O'zbekiston fuqarosi bo'lishi;
- ariza bergan kunda 35 yoshdan oshmagan bo'lishi;
- xalqaro reyting tashkilotlarining yuqori 100 talik ro'yxatiga kiritilgan xorijiy OTMda ilmiy daraja olgan bo'lishi;
- xorijiy oliy ta'lim muassasasida berilgan ilmiy daraja diplomi belgilangan tartibda nostrifikatsiya qilingan bo'lishi shart.
Murojaat qilish tartibi
Kredit olish istagida bo'lgan shaxslar Yagona interaktiv davlat xizmatlari portali (my.gov.uz) orqali elektron shaklda ro'yxatdan o'tadilar. Murojaat jarayonida ariza hamda sotib olinadigan uy-joy bo'yicha qurilish tashkiloti bilan tuzilgan shartnoma ilova qilinishi kerak.
Tijorat banki uch ish kuni ichida fuqaroning to'lovga layoqatli ekanligini o'rganib chiqib, ajratilishi mumkin bo'lgan kredit miqdori yuzasidan o'z xulosasini Oliy ta'lim, fan va innovatsiyalar vazirligiga taqdim etadi.
Manba: UzA
