Nukus shahri maktablarida o'qituvchilar uchun press-tur tashkil etildi

Qoraqalpog'iston Respublikasi Pedagogik mahorat markazi tomonidan Nukus shahridagi 6-, 32- va 53-sonli umumiy o'rta ta'lim maktablarida “Kasbiy rivojlanish kuni” hamda “Kasbiy rivojlanish soati” tadbirlarining borishiga bag'ishlangan press-tur uyushtirildi. O'zbekiston Jurnalistlar uyushmasi Qoraqalpog'iston bo'limi bilan hamkorlikdagi mazkur tadbir davlat rahbarining 2024-yil 21-iyundagi qarori va Maktabgacha va maktab ta'limi vazirligining 2024-yil 7-avgustdagi buyrug'i ijrosini ta'minlash maqsadida tashkil etildi. Unda 2025-2026 o'quv yilida o'qituvchilar uchun joriy etilgan uzluksiz kasbiy rivojlanish tadbirlarining mazmun-mohiyati va ta'lim sifatiga ta'siri tanishtirildi.

Maktablardagi amaliy jarayonlar

Ishtirokchilar dastlab 6-sonli maktabda bo'lib, metodik ishlar, fanlar kesimidagi ochiq darslar va ilg'or pedagogik yondashuvlar bilan tanishdi. Shuningdek, filologiya yo'nalishidagi mashg'ulotlar hamda “Xalqim dono desam bo'lur” to'garagi faoliyati qiziqish uyg'otdi. 32-sonli maktabda esa 9-sinfda ingliz tili fanidan ochiq dars va 8-sinfda biologiya fanidan amaliy mashg'ulot kuzatilib, ularda interfaol metodlar va tanqidiy fikrlashni rivojlantirishga qaratilgan yondashuvlar qo'llanildi.

Ochiq darslar va yakuniy xulosalar

Shuningdek, 53-sonli umumiy o'rta ta'lim maktabida rus tili va ona tili fanlari bo'yicha metodik hamkorlik ishlari, shuningdek, 5-sinfda tabiiy fandan “Magnit kuchi” mavzusida ochiq dars namoyish etildi. Darslarda zamonaviy texnologiyalar va amaliy tajribalar qo'llanilib, o'quvchilarning mavzuni chuqur anglashiga e'tibor qaratildi. Press-tur yakunida barcha ta'lim muassasalarida yo'lga qo'yilgan “Kasbiy rivojlanish kuni” va “Kasbiy rivojlanish soati” tadbirlarining ahamiyati yuzasidan batafsil ma'lumot berildi.