Oliy ta'lim muassasalari bakalavriatiga onlayn ro'yxatdan o'tish boshlandi
OTM bakalavriatiga qabul ikki bosqichda — «avval test, so'ng tanlov» tamoyili asosida o'tkaziladi.
Prezidentning PF-81-sonli farmoniga muvofiq, OTM bakalavriatiga qabul jarayoni ikki bosqichda amalga oshiriladi. Bunda «avval test, so'ng tanlov» tamoyili qo'llaniladi.
Birinchi bosqich va ro'yxatdan o'tish
Birinchi bosqichda abituriyentlar 5 iyundan 25 iyunga qadar Bilimni baholash agentligining rasmiy sayti orqali onlayn ro'yxatdan o'tadilar. Bu jarayonda ta'lim tili, fanlar majmuasi hamda test topshirish hududi tanlanadi. Alohida iqtidor talab etiladigan ta'lim yo'nalishlariga hujjat topshiruvchi shaxslar qo'shimcha ravishda ta'lim yo'nalishi va kasbiy yoki ijodiy imtihon topshiriladigan oliygohni ham belgilashlari lozim.
Kirish imtihonlari iyul–avgust oylarida o'tkaziladi. Test natijalari imtihon topshirilgan kunning ertasiga e'lon qilinadi.
Ikkinchi bosqich va shtablar faoliyati
Imtihonlar to'liq yakunlanganidan keyin abituriyentlarga 15 kun davomida OTM, bakalavriat ta'lim yo'nalishi, ta'lim shakli va tanlov ustuvorligini tanlash imkoniyati beriladi. Talabalikka tavsiya etilganlar ro'yxati qabul jarayonining ikkinchi bosqichi tugallanganidan keyin bir hafta ichida ma'lum qilinadi.
Shuningdek, abituriyentlar hamda ularning ota-onalariga yaqindan yordam berish va maslahat taqdim etish maqsadida Oliy ta'lim, fan va innovatsiyalar vazirligi hamda barcha oliy ta'lim muassasalarida «Qabul-2026» shtablari faoliyati yo'lga qo'yildi.
Manba: Kun.uz