Xorijiy va nodavlat OTMlar uchun maqsadli kvota imtihonlari ruxsatnomalari tarqatildi
Xorijiy va nodavlat oliy ta'lim tashkilotlari hamda Qoraqalpog'iston yoshlari uchun ajratilgan maqsadli kvotalar test sinovlariga ruxsatnomalar e'lon qilindi.
Xorijiy va nodavlat oliy ta'lim tashkilotlari hamda ularning filiallariga ajratilgan 1 452 ta, shuningdek, qoraqalpog'istonlik yoshlar uchun xorijiy va nodavlat oliy ta'lim tashkilotlari hamda ularning filiallariga ajratilgan 200 ta maqsadli kvota uchun o'tkaziladigan imtihonlarga ruxsatnomalar e'lon qilindi.
Test sinovlari 28-oktabr kuni bo'lib o'tadi. Test sinovida ishtirok etuvchi talabgorlar imtihonda qatnashish uchun ruxsatnomani my.uzbmb.uz saytidagi shaxsiy kabinetlari orqali yuklab olishlari mumkin.
Ruxsatnomada test sinovi o'tkaziladigan sana, manzil va vaqt ko'rsatilgan bo'lib, talabgorlardan test sinovlariga ruxsatnomada ko'rsatilgan vaqtdan kechikmagan holda kelish so'raladi. Talabgorlar test sinovlari o'tkaziladigan binoga shaxsini tasdiqlovchi hujjat (pasport yoki ID-karta) asosida kiritiladi.
Shuningdek, talabgorlardan imtihonga ortiqcha buyumlar, jumladan, elektron qurilmalar, sumka, kitob, daftar, yozuv qurollari, ichimlik, ovqat va shaxsiy buyumlar olib kelmaslik so'raladi.
Manba: Kun.uz