Oliy ta'lim muassasalari uchun 2027-yildan yangi reyting va moliyalashtirish tizimi joriy etilishi mumkin

Oliy ta'lim tashkilotlarining milliy reytingini yuritish tartibiga o'zgartirish va qo'shimchalar kiritish bo'yicha loyiha e'lon qilindi. Agar mazkur hujjat qabul qilinsa, milliy reytingni yuritish va rag'batlantirish tartibi biriktirilgan holda nizomning nomi ham o'zgaradi. Jarayonni Prezident Administratsiyasi huzuridagi Ta'lim sifatini ta'minlash milliy agentligi amalga oshirishi belgilangan.

Reyting natijalari bo'yicha taqsimot

Loyihaga muvofiq, har bir toifa doirasidagi oliy ta'lim tashkilotlari reyting natijalariga ko'ra uchta darajaga bo'linadi:

• eng yuqori natija ko'rsatgan 20 foizi birinchi darajaga;
• keyingi 40 foizi ikkinchi darajaga;
• qolgan 40 foizi uchinchi darajaga.

Moliyaviy rag'batlantirish davlat OTMning moliyalashtirish usulidan kelib chiqqan holda amalga oshiriladi. Moliyaviy mustaqillik berilgan universitetlar uchun rag'bat davlat granti asosida o'qiyotgan bir nafar talabani moliyalashtirish miqdoriga nisbatan qo'llaniladi. An'anaviy tartibda moliyalashtiriladigan davlat OTMda esa hisob-kitoblar xarajatlarni qoplash uchun ajratilgan davlat byudjeti mablag'lariga nisbatan bajariladi. Biroq taqdim etilgan loyiha matnida har bir daraja uchun rag'batlantirishning aniq foizi yoki summasi keltirilmagan.

Mablag'larni o'tkazish tartibi va OTMga qo'yiladigan talablar

Reytingning yakuniy natijalari e'lon qilingach, Ta'lim va ilm-fan vazirligi rag'bat mablag'larini o'n besh ish kuni ichida tegishli OTMning shaxsiy g'azna hisobvaraqlariga o'tkazishi nazarda tutilgan. Ushbu mablag'lardan qanday foydalanish bo'yicha qarorni oliy ta'lim muassasasining o'zi qabul qiladi.

Loyihada reytingga kiritiladigan OTMga qo'yiladigan talablar ham aniqlashtirilmoqda. Unga ko'ra, tashkiliy-huquqiy shaklidan qat'i nazar, tashkil etilganiga uch yil to'lgan va bakalavr bitiruvchilari mavjud oliy ta'lim tashkilotlari baholanadi. Oliy harbiy va harbiylashtirilgan ta'lim muassasalari bundan mustasno etib belgilangan. Shuningdek, THE, QS va ARWU xalqaro reytinglarining umumiy Top-1000 ro'yxatidan O'zbekiston nomidan o'rin olgan OTM uchun milliy reyting alohida yuritilishi mumkin, biroq bu qoida sohalar bo'yicha tuziladigan xalqaro reytinglarga tatbiq etilmaydi.

OTMlar hisobot yiliga oid ma'lumotlarni keyingi yilning 1-iyuniga qadar maxsus platformaga kiritishi taklif qilinmoqda. Xalqaro obro'ni baholash jarayonida esa xorijiy hamkor universitetlar va ilmiy tashkilotlarning 200 nafargacha xodimini jalb etish ko'zda tutilgan.