Milliy sertifikat imtihonlariga ro'yxatdan o'tishdagi muammolar yuzasidan senator so'rovi yuborildi
Milliy sertifikat imtihonlariga ro'yxatdan o'tish jarayonidagi cheklovlar va o'rinlar taqsimoti yuzasidan senator Bilim va malakalarni baholash agentligiga murojaat qildi.
Pedagoglar va mutaxassislarning bilimini baholashda milliy sertifikat imtihonlari muhim o'rin tutadi. Biroq mazkur sinovlarga hujjat topshirish jarayonida ba'zi hududlarda ro'yxatdan o'tish qisqa fursatda yakunlanib qolayotgani jamoatchilik va talabgorlarning haqli e'tirozlarini keltirib chiqarmoqda. Hozirgi kunda umumiy muddat tugamagan bo'lsa ham, muayyan hudud uchun belgilangan o'rinlar to'lib qolishi sababli boshqa nomzodlar ro'yxatdan o'ta olmayotgani kuzatilmoqda.
Senator so'rovining asosiy mazmuni
Ijtimoiy tarmoqlardagi keng muhokamalarni inobatga olib, Oliy Majlis Senati a'zosi Q.Tursunov Bilim va malakalarni baholash agentligi direktori M.Karimov nomiga senator so'rovini yo'lladi. Murojaatda quyidagi masalalar yuzasidan tushuntirish berish so'ralgan:
- Hudud va fanlar kesimida o'rinlar qanday mezonlar asosida ajratilayotgani;
- Ro'yxatdan o'tish jarayonida bo'sh o'rinlar mavjudligi haqidagi axborotning ochiqligini ta'minlash choralari;
- Har bir hudud uchun kvota belgilashda potensial talabgorlar soni hisobga olinishi;
- Bir hududda o'rinlar tugab, boshqalarida bo'sh joylar qolganda ularni qayta taqsimlash imkoniyati mavjudligi;
- Talab yuqori bo'lgan hududlar uchun qo'shimcha o'rinlar yoki navbatdagi imtihonlarni tashkil etish chora-tadbirlari.
Qonunchilikka muvofiq, mazkur senator so'roviga o'n kun ichida asoslantirilgan javob taqdim etilishi belgilangan.
Manba: UzA