Oliy ta'lim va ilm-fan tizimini takomillashtirish bo'yicha yangi chora-tadbirlar belgilandi

Prezident Shavkat Mirziyoyev raisligida oliy ta'lim, fan va innovatsiyalar tizimini yanada takomillashtirishga qaratilgan yangi takliflar taqdimoti o'tkazildi. So'nggi yillarda mamlakatda ta'lim qamrovini kengaytirish va sifatini oshirish borasida ishlar olib borilayotgan bo'lsa-da, ilm-fanni iqtisodiyot bilan uzviy bog'lash dolzarb vazifa bo'lib qolmoqda.

Taqdimotda ko'rib chiqilgan chora-tadbirlar qatorida “U10 – O'zbekistonning global darajadagi ilg'or universitetlari” dasturi amalga oshirilishi belgilandi. Ushbu dastur asosida tanlov yo'li bilan 10 ta oliy ta'lim tashkilotiga milliy tadqiqot universiteti maqomi berilib, ularda ilmiy klasterlar tashkil qilinadi. Tanlov o'qituvchilar salohiyati, xalqaro va milliy reytinglardagi o'rin hamda moliyalashtirishdagi ulush kabi mezonlarga tayanadi. Yangi maqom olgan universitetlarga ilmiy klaster uchun Ilm-fanni moliyalashtirish va innovatsiyalarni qo'llab-quvvatlash jamg'armasi hisobidan 150 milliard so'mgacha mablag' ajratiladi.

Shuningdek, 2027-yildan boshlab oliygohlarni milliy reytingdagi natijalariga ko'ra moliyaviy rag'batlantirish tizimi ishga tushadi. Davlat granti asosida o'qiyotgan talabalar uchun ajratiladigan mablag'larni shakllantirishda ham yangi yondashuvlar joriy etilib, ta'lim yo'nalishining murakkabligi, mehnat bozori ehtiyojlari va universitet reytingi inobatga olinadi.

Ilmiy tadqiqotlar va grantlar tizimi

Ilmiy tadqiqotlarni moliyalashtirish yo'nalishida davlat dasturlari mablag'larining kamida 50 foizi ustuvor yo'nalishlarga yo'naltirilishi ko'zda tutilgan. Loyihalar xalqaro ekspertiza va tarmoq korxonalari hamkorligida saralanadi. Shuningdek, oliygohlarning “spin-off” korxonalarini tuzish orqali ilm-fan natijalarini tijoratlashtirish va texnologik transferni kuchaytirish ko'zda tutilgan.

Xalqaro talabalar va grantlar

O'zbekistonni mintaqaviy ta'lim xabiga aylantirish maqsadida respublika davlat OTMlarida har yili 500 nafargacha iqtidorli chet el fuqarolariga grant ajratishni nazarda tutuvchi “Yangi O'zbekiston stipendiyasi” dasturi amalga oshirilishi belgilandi. Yig'ilish yakunida rahbar tomonidan mas'ullarga ushbu takliflarni bosqichma-bosqich joriy etish yuzasidan tegishli topshiriqlar berildi.