Oliy ta'lim vazirligi xodimi litsenziya olib berish evaziga pul talab qilganda ushlandi
Oliy ta'lim vazirligining yetakchi mutaxassisi filial ochishga litsenziya berish evaziga 100 ming dollar olayotganda qo'lga olindi.
O'zbekiston Respublikasi Oliy ta'lim, fan va innovatsiyalar vazirligining Ta'lim tashkilotlarini litsenziyalash bo'limi yetakchi mutaxassisi jin ustida ushlandi. Ma'lum bo'lishicha, bu shaxs Qarshi shahridagi nufuzli nodavlat oliy ta'lim muassasasining Surxondaryo viloyatida filialini ochish bo'yicha litsenziya berish masalasini qisqa muddatda ijobiy hal qilib berishni va'da qilgan. Buning evaziga esa universitet mansabdoridan 100 ming AQSH dollari talab qilgan.
Tezkor tadbir tafsilotlari
Davlat xavfsizlik xizmatining Qashqadaryo viloyati bo'yicha boshqarmasi xodimlari Toshkent shahrida tezkor tadbir tashkil etdi. O'tkazilgan tadbir davomida vazirlik yetakchi mutaxassisi so'ralgan mablag'ni olayotgan vaqtida ashyoviy dalillar bilan qo'lga olindi.
Jinoyat ishi qo'zg'atildi
Mazkur holat yuzasidan DXX Tergov boshqarmasi tomonidan gumonlanuvchiga nisbatan Jinoyat Kodeksining 168-moddasi, ya'ni firibgarlikning 4-qismi “a” bandi bo'yicha jinoyat ishi ochildi. Shuningdek, unga nisbatan “qamoq” ehtiyot chorasi qo'llanilgan bo'lib, hozirgi vaqtda tergov harakatlari davom ettirilmoqda.
Manba: UzA
