Oliy ta'limda volontyorlik faoliyatini rivojlantirishning samarali modeli

Bugungi kunda oliy ta'lim oldida turgan asosiy vazifalar faqat puxta bilim berish bilan cheklanib qolmay, balki o'z fikriga ega, tashabbuskor va jamiyat hayotida faol yoshlarni tarbiyalashni ham o'z ichiga oladi. Talabalarning haqiqiy salohiyatini faqat auditoriyada to'la ochib bo'lmaydi. Uning imkoniyatlari real vaziyatlarda, odamlar bilan ishlash va jamoaviy tashabbuslarda yaqqol namoyon bo'ladi.

Volontyorlikdan professionallikkacha

Talabalar volontyorligi oddiy beg'araz yordam emas, balki shaxsiy va professional rivojlanishga xizmat qiladigan muhim pedagogik imkoniyatdir. Farg'ona davlat universiteti volontyorlik markazi rahbari Husniddin Tohirovning ta'kidlashicha, markazga oddiy ishtirokchi bo'lib kelgan talaba vaqt o'tishi bilan jamoani boshqaradigan, loyiha ishlab chiqadigan va boshqalarga yo'l ko'rsatadigan yoshga aylanadi. Shu bois markaz faoliyatini faqat o'tkazilgan tadbirlar yoki ishtirokchilar soni bilan baholab bo'lmaydi.

Asosiy mezon yoshlarning ushbu jarayonda qanday ko'nikmalarni egallagani va kelgusi bosqichga qanchalik tayyorligidir. Xorijiy tajribalarni o'rganish shuni ko'rsatadiki, ko'plab oliy ta'lim muassasalarida talabalar volontyorligi shaxsiy va kasbiy o'sish vositasi sifatida qaraladi. Muhimi, xorijiy tajribani aynan ko'chirmasdan, milliy sharoitga moslashtirish, bosqichma-bosqich rivojlantirish va mentorlik tizimini yo'lga qo'yishdir.

Samarali ish tashkil etish bosqichlari

Volontyorlik markazining samarali ishlashi uchun quyidagi aniq tizim va zanjir zarur:

• Volontyorni jalb qilish va boshlang'ich bilim berish
• Qiziqishi va qobiliyatiga mos yo'nalishni aniqlash
• Amaliy loyihalarga jalb qilish va mentorlikni yo'lga qo'yish
• Tajribasi ortgan yoshlarga mustaqil loyiha yoki jamoani boshqarish imkoniyatini berish
• Yangi volontyorlarni tayyorlash jarayoniga jalb qilish

Bugungi mehnat bozorida yosh mutaxassislardan diplom bilan birga muloqot qilish, jamoada ishlash, tashabbus ko'rsatish va muammoga yechim topish kabi amaliy ko'nikmalar talab etiladi. Volontyorlik aynan mana shu qobiliyatlarni real faoliyatda shakllantiradi. Universitetda olingan bilim volontyorlik orqali hayotiy vaziyatlarda sinovdan o'tadi va nazariyani chuqurroq anglashga yordam beradi.

Universitet rahbariyati, xususan, Farg'ona davlat universiteti rektori, pedagogika fanlari doktori, professor Bahodirjon Shermuhammedov boshchiligida yoshlar tashabbuslarini qo'llab-quvvatlashga qaratilayotgan e'tibor bu yo'nalishda yangi loyihalarni amalga oshirishga keng imkoniyatlar yaratmoqda.