Navoiy davlat universitetida ma'naviy-ma'rifiy va yoshlar bilan ishlash ishlari

Oliy ta'lim muassasalarida talabalarning bo'sh vaqtini mazmunli tashkil etish, ularni sport va san'atga jalb qilish, kitobxonlik madaniyatini oshirish hamda huquqiy savodxonligini yuksaltirish ta'lim-tarbiyaning muhim qismidir. Navoiy davlat universitetida ham ma'naviy-ma'rifiy va yoshlar bilan ishlash faoliyati shu tamoyillar asosida yo'lga qo'yilgan.

Huquqiy savodxonlik va xavfsizlik

Talabalar o'rtasida huquqbuzarlik va jinoyatchilikning oldini olish, ularni turli yot g'oyalar ta'siridan asrashga alohida e'tibor qaratilmoqda. Kiberxavfsizlik, giyohvandlikning zarari, yo'l harakati xavfsizligi va milliy qadriyatlarga bag'ishlangan uchrashuvlar orqali yoshlarning huquqiy hamda ma'naviy bilimlari oshirilmoqda.

Sport va san'at yo'nalishidagi yutuqlar

Universitetda yoshlarning bo'sh vaqtini mazmunli tashkil etish maqsadida 13 ta sport to'garagi faoliyat yuritmoqda. “Sport bilan og'usiz hayot sari”, “Salomatlik uchun 5 ming qadam”, “Men sog'lom turmush tarafdoriman”, “Talabalar ligasi” va “Rektor kubogi” kabi musobaqalar o'tkazib kelinmoqda. O'tgan davr mobaynida 34 nafar talaba xalqaro musobaqalarda g'oliblikni qo'lga kiritdi.

Shuning bilan birga, san'at va ijod yo'nalishida 20 ga yaqin to'garak va klublar, jumladan, “Qizlarjon”, “Lider qizlar”, “Zulfiyaxonim izdoshlari”, “Zakovat” intellektual klublari, “Navoiy talabalar teatri” studiyasi, “Zarb” ansambli va “Quvnoqlar va zukkolar” jamoalari faoliyat ko'rsatmoqda.

Iqtidorli yoshlarni rag'batlantirish

2026-yilda “Besh tashabbus olimpiadasi” doirasidagi tadbirlarga 9 mingdan ortiq talaba-yoshlar qamrab olindi. Natijada universitetning 16 nafar talabasi Prezident va nomdor davlat stipendiyalariga sazovor bo'ldi.

Shuningdek, ijtimoiy himoyaga muhtoj talabalar bilan individual ishlashga ham e'tibor qaratilmoqda. 2025-yilda ijtimoiy himoyaga muhtoj talabalarga 1,1 milliard so'm miqdorida moddiy yordam ko'rsatilib, I va II guruh nogironligi bo'lgan talabalarga qo'shimcha stipendiyalar to'lab berildi.

Yangi o'quv yilidagi vazifalar

2026-2027 o'quv yilida tadbirlar sonini ko'paytirish emas, balki ularning mazmuni va ta'sirchanligini oshirish asosiy maqsad etib belgilangan. Kitobxonlik muhitini kuchaytirish, ijodkor yoshlarni qo'llab-quvvatlash hamda talabalar bilan ochiq muloqotlarni kengaytirish rejalashtirilgan.