"O'zbekgidroenergo" rahbari ishtirokida talaba-yoshlar bilan ochiq muloqot o'tkazildi
Toshkent irrigatsiya va qishloq xo'jaligini mexanizatsiyalash muhandislari instituti talabalari uchun "O'zbekgidroenergo" AJ raisi Islom Abdurahmonov ishtirokida ochiq muloqot tashkil etildi.
Mamlakatimizda yoshlar siyosati doirasida ta'lim va ishlab chiqarish o'rtasidagi hamkorlikni mustahkamlashga, xususan, energetika va injenerlik yo'nalishlarida kadrlar tayyorlashga alohida e'tibor qaratilmoqda. Shu munosabat bilan “O'zbekgidroenergo” aksiyadorlik jamiyati hamda “Toshkent irrigatsiya va qishloq xo'jaligini mexanizatsiyalash muhandislari instituti” Milliy tadqiqot universiteti hamkorligida talaba-yoshlar bilan uchrashuv tashkil etildi.
Kadrlar zaxirasi va amaliyot imkoniyatlari
Tadbirda universitet rektori Bahodir Mirzayev va “O'zbekgidroenergo” AJ boshqaruvi raisi Islom Abdurahmonov yoshlarga yaratilayotgan shart-sharoitlar haqida so'z yuritdi. Shuningdek, jamiyat faoliyati, respublikada amalga oshirilayotgan yirik gidroenergetik loyihalar hamda zamonaviy texnologiyalar xususida ma'lumot berildi. Talabalarga korxonada amaliyot o'tash, ishga joylashish hamda kadrlar zaxirasiga kirish mexanizmlari batafsil tushuntirildi.
Uchrashuv davomida Islom Abdurahmonov gidroenergetika sohasining strategik ahamiyatini ta'kidlab, zamonaviy bilimlarga ega yosh mutaxassislarni tayyorlash ustuvor vazifa ekanini qayd etdi. Talabalar uchun real amaliyot maydonlarini yaratish va ularning tashabbuslarini qo'llab-quvvatlash muhimligi aytib o'tildi.
G'oyalar tanlovi va ishga joylashgan talabalar
Samimiy ruhda o'tgan muloqot davomida yoshlar o'zlarini qiziqtirgan savollarga javob olib, startaplar va innovatsion loyihalar yuzasidan o'z takliflarini bildirdilar. Tadbir yakunida “Eng yaxshi g'oya” tanlovida faol qatnashgan iqtidorli talabalar faxriy yorliq va esdalik sovg'alari bilan taqdirlandi. Shuningdek, uchrashuvda faollik ko'rsatgan 3 nafar iqtidorli talabani “O'zbekgidroenergo” AJ tizimiga ishga joylashtirish bo'yicha mas'ullarga aniq topshiriqlar berildi.
Manba: UzA
