O'zbekiston davlat jahon tillari universitetida Koreya madaniyat va ta'lim markazi ochildi
O'zDJTUda Koreya Xalqaro hamkorlik agentligi bilan hamkorlikda yangi ta'lim va madaniyat markazi o'z faoliyatini boshladi.
O'zbekiston davlat jahon tillari universitetida Koreya madaniyat va ta'lim markazining ochilish marosimi bo'lib o'tdi. Mazkur majmua Koreya Xalqaro hamkorlik agentligi (KOICA) bilan hamkorlikda barpo etildi. Tadbirda oliy ta'lim maskani rahbari Ilhomjon To'xtasinov, KOICA O'zbekiston vakolatxonasi direktori Shin Myung Seop, KIDC tashkiloti bosh kotibi Kim Bok Xi, professor-o'qituvchilar, talabalar hamda xalqaro hamkorlar qatnashdi. Ushbu tashabbus universitetda bajarilayotgan yirik xalqaro loyihalardan biri sifatida baholandi.
Loyiha tafsilotlari va moliyalashtirish
Markaz O'zDJTU va KOICA o'rtasida 2025-yil 16-yanvarda imzolangan memorandum doirasida ochildi. Mazkur kelishuv 2025-2027-yillarga mo'ljallangan. Uch yillik dasturning umumiy byudjeti 1 116 000 dollarni tashkil etadi. Shundan 155 000 dollar markazni barpo etish va jihozlash ishlariga, 145 000 dollar esa moddiy-texnik bazani mustahkamlash, pedagoglar malakasini oshirish hamda talabalar uchun turli tadbirlar uyushtirishga ajratilgan.
Dastur doirasida 70 nafar koreyalik ko'ngilli jalb qilingan bo'lib, ular mamlakatimizga 5 bosqichda keladi. Hozirgi kunga qadar jami 38 nafar volontyor faoliyat ko'rsatgan bo'lsa, ularning 16 nafari ayni paytda o'z yo'nalishlarida ish olib bormoqda.
Markaz imkoniyatlari va rejalashtirilgan tadbirlar
Yangi markazda talabalar koreys tilini o'rganishi uchun qulay sharoitlar yaratilib, maxsus kurslar, treninglar va seminar mashg'ulotlari tashkil etiladi. Shuningdek, yoshlar uchun madaniy kechalar, kinoteatr namoyishlari, festival va ijodiy uchrashuvlar o'tkazish ko'zda tutilgan. Koreys tili va madaniyatiga qiziquvchilar uchun maxsus klub faoliyati yo'lga qo'yilib, bunday guruhlar doimiy ravishda qo'llab-quvvatlanadi.
Bundan tashqari, professor-o'qituvchilarning malakasini oshirish yo'nalishida ilmiy-amaliy anjumanlar va akademik almashinuv dasturlari amalga oshiriladi. Ochilish marosimida koreyslarning milliy "Sogo" hamda o'zbek raqslari, talabalarning ijodiy chiqishlari va "Samulnori" musiqiy dasturi namoyish etildi. Tadbir yakunida qatnashchilar markaz faoliyati bilan yaqindan tanishdilar.
Manba: UzA
