O'zbekiston OTMlari faoliyatini baholashda Bitiruvchilar sifat indeksi joriy etilmoqda

O'zbekistonda oliy ta'lim muassasalari faoliyatini baholashning yangi mexanizmi – Bitiruvchilar sifat indeksi amaliyotga kiritilmoqda. Mazkur indeks yordamida yoshlarning ishga joylashuvi bilan birga, ularning mehnat bozoridagi muvaffaqiyati hamda kasbiy faoliyati sifatini baholash imkoni yaratiladi. Ushbu yangi mexanizm davlat rahbariga taqdim etilgan ta'lim tizimini rivojlantirishga oid taqdimotda belgilab olindi.

Dastlabki modellashtirish natijalari

Yangi indeks bo'yicha dastlabki modellashtirish ishlari bajarildi. Bu jarayon 114 ta oliy ta'lim tashkilotining 2025-yildagi 242,6 ming nafar bitiruvchisiga tegishli ma'lumotlar asosida amalga oshirildi. Olingan dastlabki natijalarga ko'ra:

• bitiruvchilarning bandlik darajasi 75 foizni tashkil etdi;
• o'rtacha oylik ish haqi 5,1 million so'mga teng bo'ldi;
• o'rtacha ishga joylashish muddati 2 oy 1 kunni tashkil qildi;
• bitiruvchilarning 60,1 foiz qismi kamida 4 oy davomida barqaror faoliyat yuritgan.

Yo'nalishlar kesimidagi ko'rsatkichlar

Tahlillarga ko'ra, eng yuqori o'rtacha oylik ish haqi biznes va boshqaruv yo'nalishida 8,5 million so'mni, huquq sohasida 7,3 million so'mni hamda AKT yo'nalishida 6,8 million so'mni tashkil etmoqda. Shuningdek, eng yuqori indeks matematika va statistika yo'nalishida 69,6 ball, ta'lim yo'nalishida 66,7 ball hamda biznes va boshqaruv yo'nalishida 63,9 ballni qayd etgan.

Rag'batlantirish choralari

Indeks natijalariga ko'ra eng yaxshi ko'rsatkichlarga ega bo'lgan top-20 ta oliygohning Karera markazlari 500 million so'mdan rag'batlantirilishi belgilandi. Ta'kidlash joizki, mazkur ko'rsatkichlar 8 oylik kuzatuv davri asosidagi dastlabki modellashtirish hisoblanadi. Indeksning yakuniy natijalari 12 oylik ma'lumotlar asosida to'liq hisoblanib, joriy yil avgust oyida e'lon qilinadi.